Qazaqstannan Reseige jeńil avtokólikter eksporty maýsym aiynda is júzinde toqtap qaldy. Ulttyq statistika biýrosynyń málimetinshe, maýsymdaǵy jetkizilim kólemi nebári 72 dollar bolǵan. Bul kórsetkish mamyrdaǵy 111,4 myń dollarmen jáne sáýirdegi 5,5 million dollarmen salystyrǵanda aitarlyqtai tómen, dep habarlaidy dalanews.kz.
Jyl basynda Qazaqstannan Reseige avtokólik eksporty milliondaǵan dollarmen eseptelgen bolatyn. Qańtarda eksport kólemi 1 million dollardy, al aqpan men naýryzda ár aida shamamen 1,5 million dollardy qurady.
Sarapshylardyń pikirinshe, eksporttyń kúrt tómendeýine birneshe faktor áser etken. Sonyń biri – Qazaqstanǵa jeńildetilgen sharttarmen ákelingen elektromobilderdi Resei azamattaryna berýge qoiylǵan shekteýler.
Budan bólek, Resei tarapy Qazaqstannan jetkiziletin kólikterge qatysty kádege jaratý alymyn (ýtilalym) esepteý tártibin qatań teksere bastaǵan.
Al sáýir aiynda Qazaqstan Resei men Belarýsten ákelinetin avtokólikterge salynatyn kádege jaratý alymyn edáýir kóterdi. Keibir jeńil kólikter úshin bul tólem kólemi 29,4 million teńgege deiin jetýi múmkin.
Osylaisha, eki el arasyndaǵy avtokólik saýdasyna engizilgen jańa talaptar men shekteýler Qazaqstannan Reseige kólik eksportyn aitarlyqtai tejep otyr.
