5 qazanda Memleket basshysy Oman Sultanyn elorda áýejaiynda qarsy aldy, dep habarlaidy dalanews.kz.
Prezident Qasym-Jomart Toqaev Astana áýejaiynda elimizge memlekettik saparmen kelgen Oman Sultany Haisam ben Tariq Ál Saidty kútip aldy.
Qazaqstan Respýblikasy Áskeri áýe kúshteriniń ushaqtary memleket shekarasynan elordaǵa deiin Oman Sultany mingen bortpen qaptaldasa ushty. Mártebeli meiman kelýine orai ushý alańynda Qurmet qaraýyly rotasy men Prezident orkestri sap túzedi.
Áýejai zalynda eki el basshylary az-kem áńgimelesti. Memleket basshysy ekijaqty qarym-qatynasty damytý turǵysynan Oman Sultanynyń sapary tarihi mánge ie ekenin atap ótti.
"Oman Sultandyǵy ekonomikasyn ilgeriletýde zor tabysqa jetken, halyqaralyq arenada óte belsendi ári konstrýktivti dáneker memleket retinde belgili. Elińizdiń óz aimaǵynda, odan tysqary jerlerde, sonyń ishinde Qazaqstanda da bedeli biik. Memleketterimiz arasyndaǵy seriktestiktiń áleýeti zor ekenine senimdimin. Aldymyzda yntymaqtastyq aiasyn meilinshe keńeitý mindeti tur", – dedi Prezident.
Oman Sultany Haisam ben Tariq Ál Said qonaqjailyq tanytqany úshin Qasym-Jomart Toqaevqa alǵys aityp, erteńgi kelissózderdiń mazmundy ári jemisti ótetinine senim bildirdi. Sapar aiasynda joǵary deńgeide kelissózder júrgizý, birqatar mańyzdy qujatqa qol qoiý, sondai-aq, memleketter basshylarynyń qazaq-oman biznes forýmyna qatysýy josparlanǵan.
