UQShU Parlamenttik Assambleiasynyń halyqaralyq baiqaýshylary Qazaqstandaǵy alǵashqy Quryltai sailaýy joǵary deńgeide uiymdastyrylǵanyn, sailaý komissiialarynyń daiyndyǵyn jáne azamattardyń belsendiligin atap ótti. Baiqaýshylar missiiasynyń daýys berý barysyna qatysty eshqandai eskertýi bolmaǵan, dep habarlaidy dalanews.kz.
UQShU Parlamenttik Assambleiasynyń halyqaralyq baiqaýshylar tobynyń úilestirýshisi, Resei Memlekettik Dýmasynyń Qorǵanys komitetiniń tóraǵasy Andrei Kartapolov tańerteń missiia ókilderiniń birneshe sailaý ýchaskesine barǵanyn aitty. Baiqaýshylar №192 ýchaskeniń ashylýyna da qatysqan.
Onyń aitýynsha, barlyq ýchaske daýys berýdi ótkizýge qajet zattardyń bárimen tolyq qamtamasyz etilgen.
"Biz barǵan barlyq ýchaskeniń uiymdastyrylý deńgeii men daiyndyǵy óte joǵary ekenin atap ótkim keledi. Ýchaskeler sailaýdyń zań talaptaryna qatań sáikestikpen ótýi úshin qajet zattardyń bárimen tolyq qamtamasyz etilgen. Bul ýchaskelerde jumys isteýge tartylǵan qyzmetkerler daiyndyqtan ótken, óz mindetin biledi jáne olardy is júzinde oryndai alady. Biz bolǵan barlyq ýchaskede jaǵdai óte tynysh ári laiyqty deńgeide. Adamdar úlken yqylaspen kelip jatyr jáne olardyń keiin jańadan sailanǵan Quryltaidan oryn alatyn laiyqty kandidattarǵa daýys bergisi keletini kórinip tur", — dedi Kartapolov halyqaralyq baiqaýshylarǵa járdemdesý ortalyǵynda ótken brifingte.
Belarýs Ulttyq jinalysy Ókilder palatasynyń Adam quqyqtary, ulttyq qatynastar jáne buqaralyq aqparat quraldary jónindegi komissiiasynyń múshesi Edýard Severin de azamattardyń sailaýǵa qyzyǵýshylyǵy joǵary ekenin atap ótti. Onyń aitýynsha, demalys kúnindegi sailaýshylardyń belsendiligi olardyń eldiń saiasi ómirine aralasatynyn kórsetedi.
"Búgin demalys kúni bolǵanyna qaramastan, adamdar óz memleketiniń saiasi úderisterine, saiasi ómirine qyzyǵýshylyq tanytyp otyr. Osy turǵyda bolǵan ózgerister Qazaqstannyń memleket, saiasi sýbekt, UQShU jáne TMD múshesi, sondai-aq, osy uiymǵa kiretin dostas memleketterdiń seriktesi retinde tabysty, tiimdi ári turaqty damýyna yqpal etetinine nazar aýdarǵan jón", — dedi Severin.
Qyrǵyzstan Joǵary Keńesiniń Agrarlyq saiasat, sý resýrstary, jer qoinaýyn paidalaný, ekologiia jáne qorshaǵan ortany qorǵaý komitetiniń múshesi Nilýfar Álimjanova sailaý kúnin tarihi kún dep atady. Onyń aitýynsha, missiia ókilderi sailaý úderisin úshinshi kún qatarynan baqylap jatyr.
"Sailaý kúni ázirge eshqandai eskertý joqq. Barlyǵy zań talaptaryna sai ótip jatyr. Sonymen qatar, múmkindigi shekteýli adamdar úshin de barlyq shara men jaǵdai jasalǵanyn atap ótkim keledi. Adamdardyń qyzyǵýshylyǵy shynymen joǵary", — dep atap ótti Álimjanova.
Resei Federatsiia Keńesiniń Halyqaralyq ister komiteti tóraǵasynyń orynbasary Bair Jamsýev sailaý ýchaskelerinde azamattardyń erkin tańdaý jasaýyna qajet jaǵdailar jasalǵanyn aitty. Atap aitqanda, daýys berýge arnalǵan kabinalar jabdyqtalyp, sailaýshylar sailaý týraly qajet aqparatpen tanysa alatyn aqparattyq stendter ornalastyrylǵan.
"Sailaý komissiialarynyń músheleri negizinen mundai is-sharalardy ótkizý boiynsha mol tájiribesi bar adamdar ekenin de atap ótkim keledi. Olar tiisti daiyndyqtan ótken, daýys berý ýchaskelerine kelgen sailaýshylarmen jumysty bilikti ári kásibi túrde júrgizip jatyr", — dedi Jamsýev.
Baiqaý jumysynyń aralyq qorytyndysyn missiia úilestirýshisi Andrei Kartapolov shyǵardy. Onyń aitýynsha, missiia músheleri sailaý úderisiniń uiymdastyrylýy men daiyndyǵynyń joǵary deńgeiin, sondai-aq, azamattardyń daýys berýge degen qyzyǵýshylyǵyn atap ótti.
"Taǵy da atap ótkim keledi: biz barǵan barlyq jerde zań talaptaryn qatań saqtaýdan qandai da bir aýytqý kórmedik. Basqa jerden de kóremiz dep oilamaimyn. Qazaqstan halqyn osy merekemen quttyqtaimyn, bar jaqsylyqty tileimin jáne halyqtyń erkin shyn máninde bildiretin azamattar sailansyn", — dedi Kartapolov.
Baiqaýshylar kún boiy jumysyn jalǵastyrady. Olar qaladaǵy ýchaskelermen qatar aýyldyq jerlerge de barýdy josparlap otyr. Missiia sailaý barysyn baqylaý aiaqtalǵannan keiin qorytyndy tujyrymyn usynady.
