Jasandy intellekt kibershabýyldardyń tásilin ózgertip jatqan kezde tsifrlyq qaýipsizdik endi tek tehnikalyq mamandardyń máselesi emes. Memlekettik júieler, biznes, azamattardyń derekteri men kúndelikti tsifrlyq servisterdiń turaqtylyǵy bir-birimen tikelei bailanysty. Osy másele Astanada ótken KazHackStan 2026 halyqaralyq konferentsiiasynyń negizgi ózegine ainaldy, dep habarlaidy dalanews.kz.
29–30 qyrkúiekte «Táýelsizdik saraiynda» ótken konferentsiia Ortalyq Aziiadaǵy kiberqaýipsizdik salasyndaǵy iri kásibi alańdardyń birine ainaldy. Uiymdastyrýshylardyń málimetinshe, eki kún ishinde sharaǵa shamamen 10 myń adam qatysyp, Qazaqstannan jáne shetelden 100-den astam spiker sóz sóiledi.
Biylǵy konferentsiianyń negizgi taqyryby Cyber Resilience, iaǵni tsifrlyq shabýyldyń aldyn alýmen qatar, shabýyl bolǵan jaǵdaida júielerdiń jumysyn saqtap, qysqa ýaqytta qalpyna kelý qabileti boldy.
Bul tásildiń ózektiligi jasandy intellektiniń keń taralýymen de bailanysty. AI quraldary aqparatty óńdeý men qorǵanys júielerin jetildirýge múmkindik bergenimen, olardy kiberqylmys tásilderin kúrdelendirý úshin de paidalanýǵa bolady. Sondyqtan konferentsiiada qaýipsizdik máselesi tek shabýyldy toqtatýmen shektelmei, tsifrlyq infraqurylymnyń turaqtylyǵyn qamtamasyz etý turǵysynan qaraldy.
Forýmnyń memlekettik sektor men bizneske arnalǵan pikirtalastarynda ulttyq kiberturaqtylyq, shaǵyn jáne orta biznesti qorǵaý, Bug Bounty baǵdarlamalaryn damytý jáne jasandy intellektiniń qaýipsizdikke áseri sóz boldy.
Premer-ministrdiń orynbasary – jasandy intellekt jáne tsifrlyq damý ministri Jaslan Mádiev kiberqaýipsizdik máselesiniń ulttyq deńgeidegi mańyzyn atap ótti.
«Kiberqaýipsizdik búgin – ulttyq qaýipsizdik máselesi», – dedi ministr.
Onyń aitýynsha, Qazaqstanda kiberqaýipsizdik týraly zań qabyldanyp, derbes derekterdi qorǵaýǵa qoiylatyn talaptar jańartylǵan. Sonymen qatar asa mańyzdy 400-den astam nysan erekshe baqylaýǵa alynǵan.
Konferentsiiada qaýiptiń sipaty da ózgerip kele jatqany aityldy. «Digital Distrust: How AI Changes the Rules of the Game for Fraudsters and Defenders» sessiiasynda jasandy intellektiniń alaiaqtar men qorǵanys mamandary arasyndaǵy kúreske yqpaly talqylandy.
Osy rette áleýmettik injeneriia, OSINT jáne tsifrlyq kriminalistika siiaqty baǵyttarǵa da nazar aýdaryldy. Sarapshylar derbes derekterdi qorǵaý, AI-agentteriniń qaýipsizdigi, dezinformatsiia jáne qarjylyq piramidalarǵa qarsy is-qimyl máselelerin qarastyrdy.
Astana jasandy intellektini synaq alańyna ainalýy múmkin
KazHackStan aiasyndaǵy taǵy bir mańyzdy baǵyt – jasandy intellektini qalalyq ortada qoldaný máselesi boldy. Astanada jumys isteitin AI Council otyrysynda memlekettik organdar, tehnologiialyq kompaniialar men sarapshylardyń ózara is-qimyly talqylandy.
Keńes 2025 jyly Astana ákimdigi janyndaǵy konsýltativtik organ retinde qurylǵan. Onyń mindetteriniń qatarynda AI-di qala infraqurylymy men basqarý júiesine engizý, startaptardy qoldaý, kadrlyq áleýetti damytý jáne memleket, biznes pen ýniversitetter arasyndaǵy bailanysty kúsheitý bar.
Astana Hub halyqaralyq tehnoparkiniń bas direktory Maǵjan Mádiev jasandy intellekt naqty qalalyq jáne áleýmettik máselelerdi sheshýge baǵyttalǵanda ǵana praktikalyq qundylyqqa ie bolatynyn atap ótti.
Onyń málimetinshe, sońǵy úsh jylda Astana ákimdigi men Astana Innovations birlesip akseleratsiialyq baǵdarlamalar ótkizip, 67 jobaǵa qoldaý kórsetken. Onyń 36-syna óz sheshimderin qalada engizýge múmkindik berilgen.
Endigi mindet – jekelegen pilottyq jobalardy qalanyń keń aýqymyna shyǵarý. Bul jerde memleket infraqurylym men jaǵdai qalyptastyrsa, biznes suranysty anyqtap, startaptar tehnologiialyq sheshimderdi synaqtan ótkizip, jetildiredi degen tásil usynyldy.
Kiberqaýipsizdik tek tehnologiia emes
Konferentsiia barysynda tsifrlyq qaýipsizdiktiń taǵy bir qyry – mamandardyń biliktiligin arttyrý men tájiribe almasý máselesi de kóterildi.
Qazaqstan Ulttyq bankiniń Tsifrlyq damý ortalyǵy men TSARKA tsifrlyq damý jáne kiberqaýipsizdik salasyndaǵy yntymaqtastyq týraly memorandýmǵa qol qoidy. Taraptar aqparattyq qaýipsizdik salasynda birlesken bastamalardy júzege asyryp, tehnologiialyq sheshimderdi synaqtan ótkizýdi josparlap otyr.
Sonymen qatar seminarlar, treningter jáne kiberoqý jattyǵýlaryn ótkizý kózdelgen.
Bul baǵyttyń mańyzy kiberqaýipterdiń tek baǵdarlamalyq qamtamasyz etý nemese serverlerge shabýyl jasaýmen shektelmeitindigimen bailanysty. Qaýipsizdik júiesiniń álsiz tusy kei jaǵdaida tehnologiia emes, ony paidalanatyn adam bolýy múmkin. Sondyqtan mamandardyń daiyndyǵy, uiym ishindegi qaýipsizdik mádenieti jáne kiberoqý da qorǵanystyń bir bóligine ainalyp otyr.
Kiberqaýipsizdikke qyzyǵýshylyq mektepten bastalady
KazHackStan 2026 aiasynda jasóspirimder arasynda da ulttyq irikteý uiymdastyryldy. Mektep oqýshylary International Cybersecurity Olympiad 2027 halyqaralyq olimpiadasyna Qazaqstan quramasyna ený úshin Jeopardy CTF formatynda baq synady.
Nátijesinde birinshi oryndy Nesipaev Ilias, ekinshi oryndy Qaiyrgeldi Nurali, úshinshi oryndy Hamidolla Nurahmet ielendi. Úzdik ondyqqa Rymbek Dáýit, Marat Jangir, Bolarbek Beknýr, Beketov Dáýjan, Muhametqali Alihan, Maratova Arýjan jáne Alimov Arman kirdi.
Bul rette konferentsiia tek teoriialyq pikirtalas alańy bolǵan joq. Onyń tehnikalyq bóliginde mamandar naqty kibershabýyldardy taldaý jáne olarǵa qarsy qorǵaný tásilderin qarastyrdy.
Secure Development & Hack Day baǵdarlamasynda AppSec jáne DevSecOps, bultty infraqurylym, LLM jáne AI-assistentter, kriptografiia, ziiandy baǵdarlamalar, apparattyq qaýipsizdik jáne kibershabýyldardy taldaý máseleleri qamtyldy.
Qazaqstannyń óz elektronikasyn damytý jáne chip design baǵyty da jeke talqylandy.
CyberKumbez: shabýyl men qorǵanys synaǵy
Konferentsiianyń praktikalyq bóligindegi negizgi jarystardyń biri CyberKumbez boldy. Qatysýshylar eki baǵytta – shabýyldaýshy Red Team jáne qorǵaýshy Blue Team formattarynda baq synady.
Red Team sanatynda birinshi oryndy FR13NDS TEAM, ekinshi oryndy ZeroTrust, úshinshi oryndy AzCyberForce ielendi.
Blue Team boiynsha Pepe_schnelle birinshi, rasmgaol ekinshi, ZHAUBASAR úshinshi oryn aldy.
Mundai formatta qatysýshylar teoriialyq bilimmen shektelmei, naqty stsenariilerge jaqyn jaǵdaida júieni buzý nemese qorǵaý mindetterin oryndady.
Kelesi kezeń – tehnologiiany turaqty qorǵaý
KazHackStan 2026 qorytyndysy kiberqaýipsizdik kún tártibiniń jasandy intellektiniń damýymen qatar kúrdelene túsip otyrǵanyn kórsetti. Endi tsifrlyq júieni qorǵaý tek shabýyldyń aldyn alýmen shektelmeidi. Memleket pen bizneske shabýyl kezinde jumysty jalǵastyrý, derekterdiń qaýipsizdigin saqtaý jáne júieni tez qalpyna keltirý qabileti de qajet.
Konferentsiia AI MONTH 2026 baǵdarlamasy aiasynda ótti. Is-sharalar 23 qyrkúiek pen 23 qazan aralyǵynda Tsifrlandyrý jáne jasandy intellekt jylyna arnalǵan baǵdarlama sheńberinde uiymdastyrylýda.
KazHackStan 2017 jyldan beri ótkizilip keledi. Biylǵy konferentsiiany TSARKA Qazaqstan Respýblikasynyń Jasandy intellekt jáne tsifrlyq damý ministrligimen, IIM Kiberqylmysqa qarsy is-qimyl departamentimen jáne Astana ákimdigimen birlesip uiymdastyrdy.
