Qazaqstanda 14 pen 22 jas aralyǵyndaǵy azamattardyń 50 myń teńgeden joǵary tulǵaaralyq aqsha aýdarymdaryn qosymsha biometriialyq rastaý arqyly júrgizý usynyldy, dep habarlaidy dalanews.kz.
Bul usynysty Quryltai depýtaty Didarbek Dildábek 7 qazandaǵy otyrysta depýtattyq saýalyn jariialaý kezinde aitty. Depýtattyń sózinshe, jeńil tabysqa qyzyqqan keibir jastar ózderiniń bank shottaryn basqa adamdarǵa «jalǵa berý» arqyly zańsyz aqsha ainalymyna tartylýy múmkin. Alaida olar mundai árekettiń saldaryn jáne ózderine júkteletin jaýapkershilikti tolyq túsine bermeidi.
Osyǵan bailanysty depýtattar 14–22 jastaǵy azamattardyń 50 myń teńgeden asatyn tulǵaaralyq aýdarymdaryna qosymsha biometriialyq rastaý engizý múmkindigin qarastyrýdy usyndy.
Dildábek quqyqtyq statistikaǵa súienip, 2026 jylǵy maýsym aiynyń basyndaǵy jaǵdai boiynsha dropperlik isteri boiynsha 214 kúdiktiniń 159-y 18–29 jas aralyǵynda bolǵanyn aitty. Olardyń 140-y jumyssyz.
«Bul qylmystyń aldyn alý sharalaryn jastardy jumyspen qamtý jáne áleýmettik qoldaýmen qatar júrgizý qajettigin kórsetedi», - dedi depýtat.
Jastardy dropperlikke jáne esirtki taratý shemalaryna tartýdyń aldyn alý úshin depýtattar oqý jylynyń alǵashqy 15 kúninde birinshi kýrs stýdentteri arasynda túsindirý jumystaryn júieli túrde júrgizýdi de usyndy.
Mundai túsindirý kezinde esirtki qylmystaryna jáne bank shottaryn basqa adamdarǵa berýge bailanysty táýekelder týraly aqparat berilýi kerek. Sonymen qatar áleýmettik osal jastardyń qajettilikterin «Tsifrlyq otbasy kartasy» arqyly anyqtap, olarǵa ataýly kómek kórsetý usynyldy.
Depýtattyń aitýynsha, kómekke muqtaj kolledj stýdentterin tegin tamaqpen jáne kiim alýǵa arnalǵan vaýcherlermen qamtamasyz etý múmkindigin qarastyrý qajet. Sondai-aq kommýnaldyq kásiporyndar bazasynda eńbek zańnamasyna sáikes kún saiyn jalaqy tólenetin qysqa merzimdi jumys oryndaryn uiymdastyrý usynyldy.
Dildábektiń pikirinshe, jastarǵa zańdy jolmen tabys tabýǵa múmkindik jasaý jáne áleýmettik qoldaýdy ýaqytyly kórsetý olardy qylmystyq ortaǵa tartýdyń aldyn alýdyń mańyzdy tetikteriniń biri.
