Qazaqstanda járdemaqy alýshylardy turmys deńgeiine qarai saralaý júiesi engizilmek. Qarjy mamany, Qazaq Expert Club sarapshysy Saida Tileýlenovanyń pikirinshe, bul kómekti shyn máninde muqtaj azamattarǵa kóbirek baǵyttaýǵa múmkindik beredi, dep habarlaidy dalanews.kz.
Sarapshynyń aitýynsha, birdei mólsherdegi tólem ár otbasyǵa ártúrli áser etedi. Máselen, jeke baspanasy, turaqty tabysy, jinaǵy bar otbasy men birneshe bala tárbielep, páter jaldap, nesie tólep otyrǵan otbasynyń jaǵdaiy birdei emes.
Jańa júiede otbasynyń tabysy ǵana emes, múlki, nesiesi jáne basqa da qarjylyq jaǵdaiy eskeriledi. Bul úshin Qazaqstandaǵy tsifrlyq júieler arqyly qajet málimet tekseriledi.
Saida Tileýlenovanyń sózinshe, mundai tásil járdemaqyny zańsyz alýǵa qatysty jaǵdailardyń aldyn alýǵa da kómektesedi. Mysaly, 2025 jyly Túrkistan oblysynda 86 otbasy 17 mln teńge kólemindegi ataýly áleýmettik kómekti zańsyz alǵany anyqtalǵan. Onyń ishinde 13 otbasy tabysyn, 22 otbasy múlkin jasyrǵan.
Alaida sarapshy otbasynyń ál-aýqatyn baǵalaǵanda tek tabys pen múlikke súienýge bolmaitynyn aitty. Páter nemese kólik bolýy adam aýqatty ekenin bildirmeidi. Otbasynyń nesiesi, emdelýge jumsaityn shyǵyny, bala sany, asyraýyndaǵy adamdary, densaýlyǵy, jumyspen qamtylýy da eskerilýi kerek.
Sonymen qatar, azamattar otbasy qai sanatqa jatqyzylǵanyn túsinip, qoldanylǵan málimetti tekserip, qate bolsa sheshimge shaǵymdana alýy mańyzdy.
Sarapshynyń pikirinshe, járdemaqy alýshylar sanyn azaitý emes, áleýmettik kómekti shyn máninde muqtaj otbasylarǵa baǵyttaý basty nátije bolýy kerek.
