Qazaqstanda turǵyn úilerdi tabiǵi apattardan mindetti saqtandyrý júiesin engizý josparlanyp otyr. Mundai usynys Qarjy naryǵyn retteý jáne damytý agenttigi ázirlegen 2030 jylǵa deiingi saqtandyrý naryǵyn damytý baǵdarlamasynda qamtylǵan, dep habarlaidy dalanews.kz.
Qujatqa sáikes, reformanyń alǵashqy kezeńinde turǵyn úilerdi úsh túrli tabiǵi apattan mindetti saqtandyrý usynylady:
- jer silkinisi;
- sý tasqyny men kóktemgi tasqyndar;
- tabiǵi orman órtteri.
Joba avtorlarynyń pikirinshe, bul shara turǵyn úi ielerine baspanasy qatty zaqymdanǵan nemese tolyqtai joiylǵan jaǵdaida saqtandyrý tólemderin alýǵa múmkindik beredi. Nátijesinde tótenshe jaǵdailardan keiin azamattardyń qarjylyq shyǵyny azaiyp, memlekettik kómekke táýeldilik tómendeidi.
Baǵdarlamada mindetti saqtandyrýdyń biryńǵai modeline kóshý de qarastyrylǵan. Negizgi talaptar zań deńgeiinde bekitilse, tarifter men jekelegen sharttar normativtik-quqyqtyq aktiler arqyly rettelip otyrady.
Sondai-aq táýekelge negizdelgen tariftik júieni engizý usynylǵan. Bul jaǵdaida saqtandyrý polisiniń quny turǵyn úidiń ornalasqan jeri men qaýip deńgeiine qarai esepteledi. Alaida tarifterdi retteýshi organ belgileitin arnaiy shekter aiasynda anyqtaý kózdelip otyr.
Qarjy naryǵyn retteý jáne damytý agenttigi jańa mindetti saqtandyrý túrleri avtomatty túrde engizilmeitinin atap ótti. Árbir bastama boiynsha saqtandyrýǵa jatatyn azamattar sanyn, saqtandyrý tóleminiń kólemin, jarnalardyń qoljetimdiligin jáne jańa tetiktiń qajettiligin anyqtaý úshin arnaiy aktýarlyq baǵalaý júrgiziledi.
Eger bastama qabyldansa, Qazaqstandaǵy turǵyn úi ieleri úshin jer silkinisi, sý tasqyny jáne orman órtteri siiaqty tabiǵi apattardan saqtandyrý mindetti talaptardyń birine ainalýy múmkin.
