Qazaqstanda kei azamattar múlik salyǵyn tolyq tólemeýi múmkin. Jeńildikterdiń kópshiligi salyqty tolyq alyp tastamaidy, tek salyq esepteletin múlik qunyn azaitady, dep habarlaidy dalanews.kz.
Mysaly, bólek turatyn zeinetkerlerdiń salyq salynatyn múlik quny 1000 AEK-ke, iaǵni 2025 jylǵa eseptegende 3 932 000 teńgege azaitylady. Bul úshin azamattyń úiinde tek zeinetkerler tirkelýi kerek. Zeinetker jalǵyz turýy mindetti emes.
Sonymen qatar, jer ýchaskesi boiynsha da jeńildikter qarastyrylǵan. 1000 AEK kólemindegi jeńildik Keńes Odaǵynyń batyrlary jáne Sotsialistik Eńbek Erlerine, "Halyq qaharmany", "Qazaqstannyń Eńbek Eri" ataǵyn alǵandarǵa, "Otan" jáne úsh dárejeli "Eńbek Dańqy" ordenderiniń iegerlerine, sondai-aq, "Altyn alqa" iegerlerine beriledi.
Uly Otan soǵysy jáne soǵys ardagerleri, tyl eńbekkerleri men múgedektigi bar adamdar úshin jeńildik kólemi - 1500 AEK, iaǵni 5 898 000 teńge. Al jetim balalar men ata-anasynyń qamqorlyǵynsyz qalǵan 18 jasqa deiingi balalar ózderine tiesili jyljymaityn múlikke salyq tólemeidi.
Salyq jeńildigi esepke alynbasa, ony rastaityn qujatpen jyljymaityn múlik ornalasqan jerdegi memlekettik kirister basqarmasyna júginip, qaita esepteý týraly ótinish berýge bolady.
2025 jylǵa eseptelgen múlik salyǵyn 2026 jylǵy 1 qazanǵa deiin tóleý qajet. 2 qazannan bastap bereshekke ósimpul esepteledi.
