Ishki ister ministrligi qoǵamdyq oryndarda adamnyń bet-júzin tanýǵa kedergi keltiretin kiim kiiýge zań boiynsha tyiym salynǵanyn eske saldy, dep habarlaidy dalanews.kz.
Vedomstvo málimetinshe, bul talap "Quqyqbuzýshylyq profilaktikasy týraly" zańda qarastyrylǵan.
Alaida shekteý aýa raiyna bailanysty, meditsinalyq kórsetilimder kezinde, sondai-aq, qyzmettik mindetti oryndaý barysynda jáne sporttyq ne mádeni is-sharalarǵa qatysýshylarǵa qoldanylmaidy.
Ákimshilik quqyqbuzýshylyq týraly kodekstiń 434-3-babyna sáikes mundai quqyqbuzýshylyq alǵash ret anyqtalsa, eskertý beriledi. Bir jyl ishinde qaitalansa, 10 ailyq eseptik kórsetkish kóleminde aiyppul salynady.
Qazir osy talapty buzǵany úshin 1613 adam ákimshilik jaýapkershilikke tartylǵan.
