"Aýtizm Qazaqstan" qaýymdastyǵy ǵylymi dáleldenbegen tásilder arqyly aýtizmdi tolyq emdeýge ýáde beretin ortalyqtardyń qyzmetin qatań baqylaýǵa shaqyrdy, dep habarlaidy dalanews.kz.
Buǵan Máskeýde jeke klinikanyń direktory men dárigeriniń ustalǵany sebep bolǵan. Tergeý málimetinshe, olar aýtizmi jáne aýyr nevrologiialyq diagnozy bar balalardyń ata-analaryna tiimdiligi dáleldenbegen qymbat emdeý ádisterin usynǵan.
Osy oqiǵadan keiin qaýymdastyq Qazaqstanda da osyndai ortalyqtardyń jumysyna baqylaýdy kúsheitip, ata-analardy adastyryp, jalǵan úmit syilaityn adamdardy jaýapqa tartý qajet ekenin málimdedi.
"Qazaqstanda da osyndai klinikalardyń basshylaryn kóptegen ata-anany jańylystyrǵany úshin jaýapqa tartatyn tetik qajet. Qazir bul salada josyqsyz klinikalar men jekelegen adamdar esh kedergisiz jumys istep, ǵylymi turǵyda dáleldenbegen ádister arqyly aýtizmnen "ǵajaiyp jolmen aiyqtyrýǵa" ýáde berip júr", - delingen qaýymdastyq málimdemesinde.
Uiym mundai ortalyqtardy tiimdi baqylaý úshin Densaýlyq saqtaý ministrliginiń ókilettigin keńeitýdi usyndy.
Buǵan deiin Qazaqstannyń Densaýlyq saqtaý ministrligi de erekshe qajettiligi bar balalardyń ata-analaryna úndeý jasaǵan edi. Vedomstvo aýtizm spektriniń buzylysy resmi túrde tanylǵan neirodamý ereksheligi ekenin eske saldy. Ol balany durys tárbielemeýden, gadjet qoldanýdan nemese vaktsina saldyrýdan paida bolmaidy.
Qazirgi ýaqytta aýtizmdi qysqa merzim ishinde tolyq emdep jiberetin ǵylymi dáleldengen tásil joq. Degenmen mamandardyń kómegimen balanyń minez-qulqyn túzetýge, qarym-qatynas jáne áleýmettik ortaǵa beiimdelý daǵdylaryn damytýǵa bolady.
Dárigerlerdiń aitýynsha, "ǵajaiyp em" retinde usynylatyn terapiialar, kúmándi dári-dármekter men jalǵan ǵylymi ádister otbasylardy adastyryp qana qoimai, balanyń bilikti kómek alýyna qajet ýaqytty joǵaltýy múmkin.
