Qazaqstanda astyq pen maily daqyldar naryǵynda saýda belsendiligi tómen deńgeide qalǵany anyqtaldy. Satyp alýshylar jańa ónimniń jappai naryqqa shyǵýyn kútip otyr, dep habarlaidy dalanews.kz.
«Astyq naryǵynda tómen saýda belsendiligi saqtalýda, satyp alýshylar jańa ónimniń jappai túsýin kútýde. Arpa aitarlyqtai arzandady, al bidai baǵasynda eleýli ózgerister joq. Fermerler kólemdi usynýǵa asyqpaidy, mámileler sany az», – delingen Aýyl sharýashylyǵy ministrligi usynǵan sholýda.
Elevatordan QQS-ty qosa eseptegendegi aǵymdaǵy ortasha baǵalar boiynsha 3-synypty, kleikovinasy 28%-dan joǵary jumsaq bidaidyń bir kilogramy 117 teńge, kleikovinasy 25%-ǵa deiingi bidai – 106 teńge, 23%-ǵa deiingi bidai – 101 teńge boldy.
4-synypty bidaidyń baǵasy 90 teńge, 5-synypty bidaidyń baǵasy da 90 teńge deńgeiinde qalyptasty. 2-synypty arpa 72 teńge bolyp, bir apta ishinde 15 teńgege arzandaǵan.
Maily daqyldar naryǵynda da saýda belsendiligi tómen. Qatysýshylar kútý pozitsiiasyn ustanyp otyr.
«Zyǵyr, raps jáne qyzyl jasymyq arzandady, kúnbaǵys baǵasy turaqty. Jańa ónim boiynsha alǵashqy usynystar paida bolyp jatyr, alaida belsendilik ázirge tómen», – delingen sholýda.
Qazirgi tańda zyǵyrdyń ortasha baǵasy 198 teńge bolyp, 5 teńgege tómendegen. Raps 205 teńge deńgeiinde saýdalanyp, 20 teńgege arzandady. Kúnbaǵys baǵasy 221 teńge, saflor – 178 teńge, soia – 193 teńge, aq qysha – 215 teńge deńgeiinde.
Ministrlik sholýynda atalǵan baǵalar Qazaqstan aýmaǵyndaǵy elevatorda nemese vagonda QQS-ty qosa eseptegendegi ortasha ólshengen baǵalar ekeni kórsetilgen. Baǵa óńirge, ónimniń sapalyq kórsetkishterine jáne jetkizý sharttaryna qarai ózgerýi múmkin.
