Qazaqstanda janýarlar dúniesin qorǵaý salasynda memlekettik baqylaý júrgizetin ań inspektorlary arnaiy quraldarmen qamtamasyz etiledi, dep habarlaidy dalanews.kz.
Bul týraly Ekologiia jáne tabiǵi resýrstar ministrliginiń buiryǵynda aitylǵan.
Qujatqa sáikes, janýarlar dúniesin qorǵaý, ósimin molaitý jáne paidalaný salasynda memlekettik baqylaý men qadaǵalaýdy júzege asyratyn laýazymdy tulǵalarǵa, sondai-aq janýarlar dúniesin memlekettik qorǵaý qyzmetkerlerine birqatar arnaiy qural beriledi.
Olardyń qatarynda kisen, arnaiy rezeńke taiaq, mehanikalyq áserden qorǵaityn keýdeshe, jarqyldaýyq sham jáne avtokólikti májbúrli túrde toqtatýǵa arnalǵan «Ej-M» qurylǵysy bar.
«Ej-M» qurylǵysy kólik qozǵalysyn májbúrli túrde toqtatýǵa arnalǵan. Ol avtokóliktiń dóńgelekterin zaqymdaý arqyly qozǵalysyn toqtatýǵa múmkindik beredi.
Arnaiy quraldardyń berilýi ań inspektorlarynyń qyzmettik mindetterin oryndaý kezinde qaýipsizdigin qamtamasyz etýge jáne janýarlar dúniesin qorǵaý salasyndaǵy zań buzýshylyqtardyń jolyn kesýge baǵyttalǵan.
