Almatyda «Qazaqfilm» kinostýdiiasynyń aýmaǵynda otandyq kino óneriniń tarihy men onyń kórnekti ókilderine arnalǵan zamanaýi taqyryptyq saiabaq qurý josparlanyp otyr, dep habarlaidy dalanews.kz.
Joba Almatyǵa jumys sapary barysynda QR Premer-ministriniń orynbasary, Mádeniet jáne aqparat ministri Aida Balaeva men qala ákimi Darhan Satybaldyǵa tanystyryldy.
Almaty ákimdigi kinostýdiia aýmaǵyndaǵy 5,5 gektar jerge saiabaq salýdy josparlap otyr. Ol ashyq qoǵamdyq keńistik retinde jasalyp, kelýshilerge qazaq kinosynyń tarihymen, «Qazaqfilmniń» qyzmetimen jáne mýzei ekspozitsiialarymen tanysýǵa múmkindik bermek.
Saiabaqta mádeni-aǵartýshylyq is-sharalar ótkizýge arnalǵan alańdar da qarastyrylady. Bolashaqta munda otandyq kinematografister, mádeniet jáne óner qairatkerleriniń qatysýymen túrli is-sharalar uiymdastyrý josparlanyp otyr.
Aida Balaeva «Qazaqfilmniń» qazirgi jaǵdaiyna qatysty birqatar máseleni atap ótti. Ministrdiń aitýynsha, ulttyq kinostýdiia bir kezeńde bankrottyqqa jetkizilý qaýpinde bolǵan.
«Ókinishke qarai, biz ulttyq kinostýdiiamyzdan aiyrylyp qala jazdadyq. Ony qoldan bankrottyqqa jetkizýge tyrysyp, is júzinde qatardaǵy prodiýserlik kompaniiamen teńestirip qoiǵan edi. “Qazaqfilmdi” saqtap qalý úshin zańnamalyq deńgeide qoldaý sharalary qabyldandy. Sonyń ishinde kinostýdiiany memleket tarapynan tikelei qarjylandyrý da kózdelgen», - dedi Aida Balaeva.
Ministrdiń aitýynsha, kelesi jyly kinostýdiianyń pavilondaryn jóndeý josparlanyp otyr. Sonymen qatar aýmaqty abattandyrý jáne kógaldandyrý jumystary júrgiziledi.
«Qazaqfilm» aýmaǵyn jańǵyrtý aiasynda ǵimarattar men injenerlik jelilerdi kúrdeli jóndeý máselesi de qarastyrylyp jatyr. Bul baǵyttaǵy jumystardy Mádeniet jáne aqparat ministrligi kinostýdiiamen birlesip pysyqtaýda.
Qazirgi ýaqytta kinostýdiia jeke prodiýserlik kompaniialarmen yntymaqtastyqty jalǵastyryp, óndiristik bólimshelerdiń tiimdiligin arttyrýǵa baǵyttalǵan jumystar júrgizip keledi.
Sonymen qatar rekvizitter men jabdyqtardy tsifrlandyrý jobasy iske asyrylýda. Sońǵy 15 jylda alǵash ret demeýshilik qarajat esebinen kinostýdiia aýmaǵynda ishinara jóndeý jumystary júrgizilgen.
