Ǵylym jáne joǵary bilim ministrligi qazaq tilin úiretýge arnalǵan Steppe Rider oiynynyń ázirlenýine qatysty tekserý bastalǵanyn habarlady. Jobaǵa biýdjetten 239 million 888 myń teńge bólingen. Qazir isti Ulttyq qaýipsizdik komiteti men Astana qalasy boiynsha Ekonomikalyq tergep-tekserý departamenti qarap jatyr, dep habarlaidy dalanews.kz.
Ǵylym jáne joǵary bilim ministri Saiasat Nurbek Úkimettegi brifingte vedomstvonyń atalǵan organdarǵa arnaiy ótinish joldaǵanyn málimdegen.
"Qazir tergeý sharalary júrip jatyr. Onyń qorytyndysy boiynsha sot sheshimi nemese ákimshilik quqyq buzýshylyqqa qatysty sheshim qabyldanýy múmkin", - dedi ministr.
Onyń aitýynsha, budan keiingi sheshim UQK men Ekonomikalyq tergep-tekserý departamentiniń quzyretinde.
Memlekettik satyp alý portalyndaǵy málimetke sáikes, 2025 jyly ministrlik qazaq tilin úiretýge arnalǵan oiyndy ázirleý úshin "United Kingdom" JShS-men 268,6 million teńgege kelisimshart jasasqan. Keiin vedomstvo qoǵamda týyndaǵan saýaldarǵa bailanysty jobanyń quny men formatyna túsinikteme bergen.
Steppe Rider jaryqqa shyqqannan keiin qoldanýshylar oiynnyń tehnikalyq sapasyna syn aitty. Atap aitqanda, qosymshanyń jii turyp qalatyny, basqarý júiesiniń qolaisyzdyǵy jáne oiyn barysyna qatysty túsindirmeniń jetkiliksiz ekeni aityldy.
Qazaq tilin úiretýge arnalǵan jobaǵa qatysty júkteý kórsetkishteri de kúmán týǵyzdy. Ashyq derekterde oiyndy sanaýly adam ǵana júktegeni kórsetilse, ministrlik ókilderi onyń 30 myńnan astam ret júktelgenin málimdegen. Sondai-aq vedomstvo Qazaqstanmen qatar Resei men Eýropadaǵy paidalanýshylardan oń pikir túskenin habarlaǵan.
Joba synǵa ushyraǵanyna qaramastan, keiin ony elimizdegi oqytýshylar men bilim alýshylarǵa júkteý usynylǵan. Vitse-ministr Dinara Sheglova qol qoiǵan qujatta bilim berý uiymdarynyń qyzmetkerlerine Steppe Rider oiynyn júkteý jóninde ótinish aitylǵan.
