Qarttar kúnine orai Astana qalasy, Qaraǵandy jáne Túrkistan oblystarynda 150 myńnan astam turǵynǵa birjolǵy aqshalai kómek tóleý josparlanyp otyr. Ár óńirde tólem kólemi men ony alýshylar sanaty ártúrli, dep habarlaidy dalanews.kz.
Astana qalasy ákimdiginiń baspasóz qyzmeti redaktsiianyń saýalyna bergen jaýabynda jasyna bailanysty zeinetke shyqqan azamattarǵa 2,5 ailyq eseptik kórsetkish kóleminde birjolǵy tólem qarastyrylǵanyn habarlady. Biyl bul soma 10 812 teńgeni quraidy. Áleýmettik qoldaý sharasy elordadaǵy 110 myńnan astam zeinetkerdi qamtidy.
Qaraǵandy oblysynda 75 jasqa tolǵan jáne odan úlken jastaǵy 43 405 turǵynǵa 21 625 teńgeden tóleý kózdelgen. Oblystyq jumyspen qamtýdy úilestirý jáne áleýmettik baǵdarlamalar basqarmasynyń áleýmettik normativter jáne áleýmettik kómek bóliminiń basshysy Aigerim Bekishevanyń málimetinshe, bul maqsatqa jergilikti biýdjetten 938,6 mln teńge bólingen.
Al Túrkistan oblysynda kómek úide arnaýly áleýmettik qyzmet alyp júrgen jalǵyzilikti qariialarǵa beriledi. Óńir ákimdiginiń deregine sáikes, 1 253 adamǵa 5 AEK kóleminde, iaǵni 21 625 teńgeden tólem jasaý josparlanǵan.
Eske salsaq, 2026 jyly bir ailyq eseptik kórsetkish mólsheri 4 325 teńge.
Sonymen qatar Shyǵys Qazaqstan, Jambyl, Qostanai, Atyraý, Jetisý, Qyzylorda jáne Aqtóbe oblystarynda, sondai-aq Almaty, Qostanai jáne Qyzylorda qalalarynda Qarttar kúnine bailanysty arnaiy aqshalai tólem qarastyrylmaǵan. Bul aqparatty atalǵan óńirler ákimdikteriniń baspasóz qyzmetteri rastady.
Aita keteiik, 1 qazan – Halyqaralyq qarttar kúni. Bul kúndi BUU Bas Assambleiasy 1990 jylǵy 14 jeltoqsanda bekitken. Mereke alǵash ret 1991 jyly atalyp ótti. Onyń negizgi maqsaty – egde jastaǵy adamdardyń qoǵamdaǵy rólin dáriptep, olardyń quqyqtary men qajettilikterine nazar aýdarý.
