Qaraǵandy oblysy Qarqaraly aýdanyndaǵy Jańatoǵan aýyly mańyndaǵy tabiǵi órt tolyq sóndirilgen joq. 17 tamyzda tańerteń qutqarýshylar órt aýmaǵyn áýeden baqylap, jańa ashyq oshaqtardy anyqtamaǵan, dep habarlaidy dalanews.kz.
TJM málimetinshe, saǵat 08:00-de áýeden júrgizilgen baqylaý kezinde jańa órt oshaqtary tirkelmegenimen, órtti oqshaýlaý jáne tolyq joiý jumystary jalǵasyp jatyr.
Alaida túnde jaǵdai qiyn bolǵan. Jańatoǵan aýyly mańyndaǵy órtti sóndirýge qatty jel men taýly jer bederi kedergi keltirgen. Keibir oshaqtarǵa jetý qiyn bolǵandyqtan, oqiǵa ornyna qosymsha kúsh pen tehnika jiberilgen. Aýyldy qorǵaýǵa qutqarýshylar men jergilikti ákimdik qyzmetkerleri jumyldyrylyp, oblystyq Tótenshe jaǵdailar departamentinde jedel shtab qurylǵan.
Órt kezinde aýyl turǵyndary da óz kúshterimen tilsiz jaýmen kúresýge shyqqan. Áleýmettik jelide taraǵan jazbalarda turǵyndar jaqyndary birneshe kúnnen beri órtpen arpalysyp jatqanyn aityp, kómek suraǵan.
"Tańǵy saǵat 5:00, uiqy joq... Aýylymyz órtke oranyp jatyr. Jylaǵan ashy daýys, úrkip úide jalǵyz qalǵan analar, tilsiz jaýmen eki kúnnen beri kúresip jatqan aýyl azamattary", - dep jazdy turǵyndardyń biri.
Taǵy bir jazbada aýyl mańyndaǵy qystaýlar men qysqa daiyndalǵan shóp órtenip ketkeni aitylǵan.
"Qanshama qysqa jinaǵan shóp, qystaqtar órtenip ketti, áli de órt órship tur! Ótinish, aýylymyzǵa kómektesińizder", - delingen jazbada.
Sonymen qatar, buǵan deiin turǵyndar órtti sóndirýge qajet tehnika jetkiliksiz ekenin aityp, alańdaýshylyq bildirgen. Keibiri órt aýylǵa jaqyndaǵanyn aityp, týystary úshin alańdaǵan. Órt saldarynan bir er adam zardap shekken. Onyń denesiniń 50 paiyzy kúiip qalǵan.
