Qamalladin University men QR Ǵylym jáne joǵary bilim ministrligine qarasty Ulttyq joǵary bilimdi damytý ortalyǵy yntymaqtastyq týraly memorandýmǵa qol qoidy. Taraptar mikrobiliktilikti damytý jáne tájiribege baǵyttalǵan bilim berý baǵdarlamalaryn jetildirý baǵytynda birlesip jumys istemek, dep habarlaidy dalanews.kz.
Memorandým aiasynda Ulttyq joǵary bilimdi damytý ortalyǵy Qamalladin University-ge oqý baǵdarlamalarynyń Ulttyq biliktilik sheńberi men elimizdegi kásibi standarttarǵa sáikestigi boiynsha konsýltatsiialyq qoldaý kórsetedi.
Sonymen qatar taraptar mikrobiliktilik máseleleri boiynsha dóńgelek ústelder men jumys toptaryna birlesip qatysýdy josparlap otyr. Qysqa merzimdi tájiribelik baǵdarlamalardy keiin joǵary oqý oryndarynyń bilim berý baǵdarlamalaryna engizýge múmkindik beretin tájiribeni damytý da kózdelgen.
"Búginde Qazaqstanda Tech Orda jáne jekemenshik bilim berý uiymdary usynatyn túrli qysqa merzimdi praktikalyq baǵdarlamalar bar. Alaida mundai kýrstardy aiaqtap, keiin joǵary oqý ornyna túsken azamattardyń buǵan deiin alǵan praktikalyq bilimi men daǵdylary joǵary bilim berý júiesinde kóp jaǵdaida esepke alynbaidy.
Osyǵan bailanysty memorandýmnyń negizgi baǵyttarynyń biri – qysqa merzimdi baǵdarlamalar men beiresmi bilim berý nátijelerin joǵary bilim berý júiesimen bailanystyrý tetikterin damytý", - deidi ýniverstitet basshylyǵy.
Degenmen qujat Qamalladin University-ge joǵary oqý orny mártebesin bermeidi jáne uiym joǵary bilim týraly diplom bermeidi. Sondai-aq memorandým taraptarǵa qarjylyq nemese múliktik mindettemeler júktemeidi. Beiresmi bilim nátijelerin taný ázirge birlesken jumystyń baǵyty retinde ǵana belgilengen.
Qamalladin University ókilderi bul kelisimdi Qazaqstanda beiresmi bilimdi taný tetikterin qalyptastyrý jolyndaǵy alǵashqy qadamdardyń biri ekenin jetkizdi.
