Qazaqstanǵa qaitarylǵan zańsyz aktivter áleýmettik jáne infraqurylymdyq jobalardy iske asyrýǵa baǵyttalyp jatyr, dep habarlaidy dalanews.kz.
Sarapshylardyń pikirinshe, bul qarajattyń naqty nysandarǵa jumsalýy óńirlerdegi ómir sapasyn arttyrýǵa múmkindik beredi.
Búginde elge 1,1 trln teńgeden astam aktiv qaitarylǵan. Onyń 617 mlrd teńgeden astamy respýblika boiynsha 500 nysandy iske qosýǵa baǵyttaldy.
Saiasi sarapshy, Qazaqstan halyq diplomatiiasy ortalyǵynyń vitse-prezidenti Vitalii Koltochnik bul jumysty Memleket basshysy Qasym-Jomart Toqaevtyń ádiletti Qazaqstan qurý baǵytynyń naqty kórinisi dep baǵalaidy.
«Zańsyz satyp alynǵan aktivterdi qaitarý tek qarjy máselesi emes. Onyń artynda qoǵamǵa tiesili resýrsty eldiń damýyna baǵyttaý degen mańyzdy saiasi mán jatyr. Qaitarylǵan qarajat áleýmettik ádilettilik pen turaqty damýǵa qyzmet etýi kerek», - dedi sarapshy.
Qaitarylǵan qarajattyń eń iri bóligi sý infraqurylymyna baǵyttaldy. 226,5 mlrd teńgege 267 joba júzege asyrylyp jatyr. Soltústik Qazaqstan oblysynyń 30-dan astam aýylyndaǵy jáne Abai oblysyndaǵy 20 myńǵa jýyq aýyl turǵyny aýyzsýǵa qol jetkizdi. Aqmola oblysynyń ondaǵan aýylynda ortalyqtandyrylǵan sý júiesi júrgizildi.
Almatynyń bes shaǵynaýdanynda qor qarajaty esebinen sý qubyry men káriz júieleriniń taratý jelileri salyndy.
Densaýlyq saqtaý salasyna 176,8 mlrd teńge baǵyttalyp, 190-nan astam joba maquldandy. Ridderde 200 oryndyq kópbeiindi aýrýhana, Aqtaýda jedel meditsinalyq járdem stantsiiasy jáne alǵashqy meditsinalyq-sanitarlyq kómek kórsetetin 145 nysan iske qosyldy.
Qostanai oblysynda aýyldyq dárigerlik ambýlatoriia men emhana paidalanýǵa berilse, Arqalyqtaǵy óńirlik aýrýhanany rekonstrýktsiialaý jalǵasyp jatyr. Shyǵys Qazaqstanda gematologiia ortalyǵy salynyp jatyr.
Sport infraqurylymyna 67,5 mlrd teńge bólindi. Bul qarajatqa Kókshetaýda kópfýnktsionaldy sport kesheni salynyp, Zerendi aýylynda dene shynyqtyrý-saýyqtyrý kesheni paidalanýǵa berildi. Astanada Qajymuqan Muńaitpasov atyndaǵy stadion jóndelip, «Qazaqstan» sport saraiyn jańǵyrtý jumystary júrgizilýde.
Bilim berý salasyna 64,4 mlrd teńge baǵyttaldy. Abai, Ulytaý, Jambyl, Qostanai jáne Soltústik Qazaqstan oblystarynda jańa bilim berý nysandary iske qosyldy. Shymkentte arnaiy mektep-internatqa arnalǵan 300 oryndyq jataqhana paidalanýǵa berildi.
Kólik infraqurylymyn damytýǵa taǵy 43 mlrd teńge bólindi. Sonymen qatar qarajat arnaiy ekonomikalyq aimaqtardaǵy jańa óndirister úshin energetikalyq jáne injenerlik infraqurylym júrgizýge jumsalyp jatyr.
Eýraziialyq saiasat institýtynyń direktory Maksim Kramarenkonyń aitýynsha, qaitarylǵan aktivterdiń áseri halyqtyń kúndelikti ómirinen kórinýi tiis.
«Bul bir rettik naýqan emes, qalyptasqan mehanizm. Qaitarylǵan qarajattyń nátijesin taza aýyzsýdan, aýyldaǵy meditsinalyq pýnktten, jańa mektepten nemese sport nysanynan kórýge bolady. Eń mańyzdysy, qarajattyń edáýir bóligi óńirlerge baǵyttalyp, aimaqtar arasyndaǵy ómir sapasynyń alshaqtyǵyn qysqartýǵa jumsalyp jatyr», - dedi Maksim Kramarenko.
Osylaisha, qaitarylǵan aktivterden túsken qarajat birtindep naqty áleýmettik nátijege ainalyp keledi. Jańa mektepter, meditsinalyq nysandar, sý júieleri men jol infraqurylymy uzaq merzimde halyqqa qyzmet etýge baǵyttalǵan.
