Sharaǵa Qazaqstan men Túrkiia jáne ózge de elderden meimandar qatysty. Atap aitsaq, Túrkiia Respýblikasy Din isteri basqarmasynyń basshysy, Bas múfti Ali Erbash hazret pen eki eldiń ziialy qaýym ókilderi boldy. Túrkistan oblysynyń ákimi Ómirzaq Shókeev tarihi tulǵa týraly baiandap, baýyrlas Qazaqstan men Túrkiia bailanysy tereńdep kele jatqanyna toqtaldy.
– Biz búgin qazaq-túrik arasyndaǵy rýhani bailanysty nyǵaitýda mańyzy joǵary bolatyn jiynda bas qosyp otyrmyz. Ótken ǵasyrdyń 50-jyldary otandastyrymyzǵa qamqorlyq tanytyp, Túrkiiaǵa kóshýine, ornyǵýyna úles qosqan Adnan Menderestiń esimin jańǵyrtý qos memleketke ortaq múdde dep bilemin. Memleket basshysy Qasym-Jomart Toqaev Túrkistan qalasyndaǵy kóshelerdiń birine Adnan Menderestiń esimin berý týraly tapsyrma bergen bolatyn. Tapsyrma aiasynda zańǵa sáikes tiisti jumystar atqarylyp, biz búgin sol kósheniń ashylý saltanatyna kýá bolyp otyrmyz.
Ózderińizge belgili, Túrkistan – bir halyqtyń ǵana emes, kúlli Túrki elderiniń rýhani ustyny retinde áspetteledi. Sondyqtan, qos elge ortaq tulǵanyń atyndaǵy bul kósheniń Túrkistan qalasynan ashylýy – zańdylyq. Sondai-aq bul bastama qazaq-túrik arasyndaǵy dostyqtyń odan saiyn nyǵaiýyna jol ashady dep senemin, – dedi Ómirzaq Estaiuly.
Kósheniń boiynda jańadan boi kótergen ákimshilik-iskerlik ortalyq, áleýmettik, kásipkerlik nysandar, turǵyn úiler jáne jańa mektep ornalasqan. Sonymen birge saiabaq pen mádeni nysandar da bar.
Saiasi qairatker, Túrkiia Respýblikasynyń Premer-Ministri qyzmetin atqarǵan Adnan Menderestiń qazaq halqyna da sińirgen eńbegi mol. Ol ótken ǵasyrdyń 50-shi jyldary qazaqtardyń Túrkiiaǵa qonystanýyna sebepker bolyp, 4 jylǵa jýyq sozylǵan qonys aýdarý protsesine qoldaý kórsetken. Tarihi tulǵanyń 1952 jylǵy qaýlysynan keiin qazaqtar Pákistannan Túrkiiaǵa qonys aýdara bastady. Pákistandaǵy qazaqtardyń alǵashqy legi 1952 jyldyń qyrkúiek aiynda kelse, sońǵy legi 1956 jyly túrik jerine jetken.
