"Portretin satyp alǵan". Pavlodar oblysynyń ákimdigi Toqaevtyń eskertýin elemeýde

Kórkem Aldabergenova 08 aqp. 2024 11:27 1896

Pavlodar oblysy Aqsý qalasynda Toqaevtyń portreti 43 448 teńgege satyp alynǵan. Osylaısha memlekettik satyp alý barysynda 3104 teńge únemdelgen. Sebebi portrettiń áýel bastaǵy quny 45 000 teńge bolǵan, - dep habarlaıdy Dalanews.kz

Prezıdenttiń portretin satyp alý týraly málimet Memlekettik satyp alý portalynda jarıalanǵan bolatyn. Eki portretti "Aqsý qalasy máslıhatynyń apparaty" memlekettik mekemesi satyp alǵan. 

Bastapqyda Toqaevtyń eki portretiniń jalpy quny 90 myń teńge dep belgilengen.

Bir portrettiń baǵasy usynystarǵa baılanysty arzandap otyrǵan.

Osylaısha "Promstroı" atty JSHS jeńiske jetip, bir portret 43 448 teńgege baǵalanǵan.

Nátıjesinde qalalyq máslıhat Toqaevtyń portretin satyp alýǵa bólingen memleket qarjysynan 3104 teńge únemdegen. 

Buǵan deıin Toqaev mundaı propaganda túrine qarsy ekenin birneshe ret aıtqan bolatyn. 
 
"Kúni keshe ǵana Aqtaýda meniń sýretim beınelengen 10-nan astam bılbord ornatylǵanyn estidim. Meniń oıymsha, bul múldem orynsyz nárse. Maǵan mundaı úgit-nasıhat qajet emes" – degen edi Toqaev 2019 jyly Aqtaý jurtshylyǵymen kezdesýinde.
Sonymen qatar, suhbattarynyń birinde jaǵympazdyqqa qarsy ekenin eskertken bolatyn. 
"Jaǵympazdarǵa qatysty aıtar bolsaq, men oǵan qarsymyn. Men múldem basqa ortada tárbıelendim. Maqtaý, madaqtaý degen atymen bolǵan joq. Ondaıdy qolpashtaý týraly áńgime aıtýdyń ózi artyq shyǵar. Olaı eshqashan da bolǵan emes. Degenmen bizdiń zıaly qaýymdy ózgertý qıyn. Olar - basqa jaǵdaıda tárbıe alǵan jandar", - dedi Qasym-Jomart Toqaev.
 
Alaıda Aqsý qalasynyń máslıhaty muny eskermegen kórinedi. 
Aıta keteıik,prezıdenttiń jaǵympazdyqqa qarsy bolǵanyna qaramastan portretin satyp alǵan mekemeler buǵan deıin de bolǵan. Mysaly byltyr Talǵar joǵary medısınalyq koleji jáne Pavlodar oblysy Aqqýly aýdany ákiminiń apparaty 17 jáne 28 myń teńgege Toqaevtyń portretin satyp alǵan. Odan bólek, byltyr qańtarda BQO-nyń Shyńǵyrlaý aýdanynyń ákiminiń apparaty prezıdenttiń 4 portretin 151 myń teńgege satyp alǵan.  

Usynylǵan
Sońǵy jańalyqtar
x