Úkimet otyrysynda kreativti indýstriialardy damytý jáne mádeniet pen óner salalaryn tsifrlandyrý máselesi qaraldy, - dep habarlaidy Dalanews.kz.
Málimetke súiensek, byltyr qazaqstandyq kino óndirisi ósken.
"Qazaqstandyq kino óndirisi byltyr 58%-ǵa ósti. Kassalyq tabysy eń joǵary 10 filmniń arasynda árbir ekinshi taspa otandyq óndiris boldy. Sheteldik jáne otandyq kartinalardan túsetin alym shamamen teńesti. Bul kórermenderdiń ulttyq kontentke degen qyzyǵýshylyǵy artyp kele jatqanyn bildiredi", - dedi Oljas Bektenov.
Premer-ministr Memleket basshysy Ulttyq quryltaida jobalar sanyn kóbeitip, paida túsirýdi ǵana maqsat etpei, filmderdiń sapasyna basa nazar aýdarýdy tapsyrǵanyn aitty.
Sonymen qatar, Úkimet basshysy túsken aqshanyń ashyqtyǵyn jáne avtorlyq quqyq saqtalýyn qamtamasyz etetin "e-kino" platformasyn jedel iske qosýdy tapsyrdy.
"Jaqsy kino túsirý úshin kóp qarajat kerek. Mundai qarajatty prokattan túsirýge bolady. Biraq qazir filmnen túsetin paidanyń kóbi kinoteatr ielerinde qalady. Sondyqtan kino túsirýshiler men ony prokatqa shyǵarýshylardyń múddeleriniń tepe-teńdigin bekitý mańyzdy. Ol úshin túsken aqshanyń ashyqtyǵyn jáne avtorlyq quqyq saqtalýyn qamtamasyz etetin "e-kino" platformasyn jedel iske qosý kerek", - dedi Oljas Bektenov.
