Ózbekstannyń Tashkent oblysy Bostanlyq aýdanyndaǵy Qaramanas aýylynda ornalasqan №34 mektepke qazaqtyń kórnekti jazýshysy, dramatýrg, aýdarmashy ári qoǵam qairatkeri Rahmetolla Raiymqulovtyń esimi berildi, dep habarlaidy dalanews.kz.
Bul sheshim Ózbekstan prezidenti Shavkat Mirziioevtiń bastamasymen jáne Tashkent oblysy ákiminiń sheshimi negizinde qabyldanǵan.
2026 jylǵy 2 qyrkúiekte Rahmetolla Raiymqulov atyndaǵy №34 mektepte jańa oqý jylynyń bastalýyna jáne jazýshynyń esimin týǵan jerinde ulyqtaýǵa arnalǵan merekelik shara ótedi.
Oǵan Ózbekstan men Qazaqstannyń memleket jáne qoǵam qairatkerleri, mádeniet pen bilim salasynyń ókilderi, qalamgerler, ádebiettanýshylar, sondai-aq jazýshynyń urpaqtary qatysady. Qonaqtar qatarynda Qazaqstannyń Ózbekstandaǵy Tótenshe jáne Ókiletti Elshisi Eraly Toǵjanov, Túrki mádenieti jáne murasy qorynyń prezidenti Aqtoty Raiymqulova, jazýshylar Qulbek Ergóbek pen Nurǵali Oraz bar.
Is-shara barysynda jańa oqý jylynyń alǵashqy qońyraýy soǵylyp, jańartylǵan mektep kitaphanasy men Rahmetolla Raiymqulovqa arnalǵan memorialdyq burysh ashylady. Sonymen qatar kitaphana qoryna jańa kitaptar tabystalyp, oqýshylardy jazýshynyń shyǵarmashylyǵymen tanystyrýǵa arnalǵan rýhani-aǵartýshylyq kesh uiymdastyrylady.
Rahmetolla Raiymqulov 1913 jyly Tashkent oblysy Bostanlyq aýdanynyń Qaramanas aýylynda dúniege kelgen. Ol qazaq jáne ózbek ádebieti men mádenietiniń damýyna, eki halyq arasyndaǵy rýhani bailanysty nyǵaitýǵa eleýli úles qosqan.
Qalamgerdiń belgili shyǵarmalarynyń qatarynda "Jasyl beles", "Túieli adam", "Baldaqty adam", "Qara jorǵa" romany jáne basqa da týyndylar bar.
