Jańa oqý jyly jaqyndaǵan tusta Densaýlyq saqtaý ministrligi ata-analarǵa balalardyń uiqy tártibin aldyn ala qalypqa keltirýge keńes berdi, dep dalanews.kz tilshisi Malim.kz saityna silteme jasap habarlaidy.
Mamandardyń málimetinshe, balanyń jasyna qarai qajetti uiqy uzaqtyǵy ártúrli bolady. 6-12 jastaǵy balalar táýligine 9-12 saǵat tynyǵýy kerek. Al 13-18 jas aralyǵyndaǵy jasóspirimderge 8-10 saǵat uiqy qajet.
Dárigerler tek uiqy uzaqtyǵyna emes, onyń turaqty rejimine de mán berý kerektigin aitady. Oqýshynyń kún saiyn bir ýaqytta uiyqtap, bir ýaqytta oianýy aǵzanyń jańa oqý kestesine tez beiimdelýine kómektesedi.
Ásirese mektep tabaldyryǵyn alǵash attaityn birinshi synyp oqýshylary úshin demalystyń mańyzy zor. Eger bala sabaqtan keiin qatty sharshaityn bolsa, alǵashqy aptalarda oǵan kúndiz eki saǵatqa deiin qosymsha tynyǵýǵa múmkindik berýge bolady.
Jazǵy demalys kezinde balalardyń uiqy rejimi jii buzylady. Sondyqtan kesh jatýǵa úirengen balany bir kúnde erte uiyqtatýǵa tyryspai, jatý jáne oianý ýaqytyn birtindep ózgertken durys.
Ministrlik keshki ýaqytta gadjetterdi paidalanýdy shekteýge de keńes beredi. Uiyqtar aldynda smartfon men kompiýterdiń ornyna kitap oqý, serýendeý nemese jai áńgimelesý siiaqty tynysh áreketterdi tańdaǵan jón.
Sondai-aq bólmeni aldyn ala jeldetip, jaily temperatýra qalyptastyrý mańyzdy.
Mamandar úi tapsyrmasy, qosymsha sabaq nemese oiyn úshin túngi uiqyny qysqartýǵa bolmaitynyn eskertedi. Uiqysy qanbaǵan oqýshynyń zeiini tómendep, jańa aqparatty qabyldaýy men este saqtaýy qiyndaidy.
