AQSh-qa jasaǵan jumys sapary aiasynda ishki ister ministri Erjan Sadenov Niý-Iork qalasynyń politsiia departamentinde qyzmet atqaryp júrgen etnikalyq qazaqtarmen kezdesti, dep habarlaidy dalanews.kz.
Kezdesý barysynda taraptar otandastardyń kásibi jolyn, ulttyq bolmysty saqtaý máselecin jáne týǵan elimen bailanysty nyǵaitý joldaryn talqylady. Ministr shetelde tabysqa jetken qazaqtardyń óz halqynyń abyroiyn asqaqtatyp, álemdegi eń iri megapolisterdiń biriniń qaýipsizdigin qamtamasyz etýge eleýli úles qosyp júrgenin atap ótti.
Kezdesýge qatysýshylardyń biri - Niý-Iork politsiiasynyń qyzmetkeri Miras Búkeshev. Ol 2000 jyly Taraz qalasynda dúniege kelip, sol jerde ósip, mektepti támamdaǵan. 2018 jyly AQSh-qa qonys aýdaryp, 2023 jyldan beri politsiiada qyzmet etedi.
Sondai-aq, kezdesýge Daniiar Nurtaza da qatysty. Ol 2002 jyly otbasymen birge AQSh-qa kóship barǵan. 2014 jyly Niý-Iork politsiiasy qataryna qabyldanǵan. Daniiar Nurtaza 2015 jyly Niý-Iork metrosynyń stantsiialarynyń biriniń mańynda tolǵaǵy bastalǵan áieldiń bosanýyna kómektesip, kópshilikke keńinen tanylǵan. Onyń kásibi ári jedel áreketi qoǵam tarapynan joǵary baǵaǵa ie bolǵan. Tártip saqshysynyń ómiri men qyzmeti týraly derekti film de túsirildi.
Erjan Sadenov otandastaryna mamandyqtaryna adaldyǵy men shetelde qazaq halqynyń bedelin kóterip júrgeni úshin alǵys aityp, aldaǵy qyzmetterine tabys jáne otbasylaryna amandyq tiledi.
