21 tamyzda Qazaqstanda eGov portaly men birqatar memlekettik internet-resýrs ýaqytsha istemei qaldy. Qazirgi ýaqytta aqaý joiylyp, aqparattyq júieler qalypty rejimde jumys istep tur, dep habarlaidy dalanews.kz.
Detector404 servisiniń málimetinshe, qoldanýshylar sait betteriniń júktelmeýine, jeke kabinetke kire almaýyna jáne eGov Mobile qosymshasynyń jumysyndaǵy aqaýlarǵa shaǵymdanǵan.
Sońǵy 24 saǵattaǵy ótinishterdiń 40 paiyzy júieniń jalpy jumysyndaǵy irkiliske qatysty bolǵan. Al sait, mobildi qosymsha jáne jeke kabinet boiynsha túsken shaǵymdardyń árqaisysynyń úlesi 20 paiyzdy quraǵan.
Halyq sanyna shaqqanda shaǵymdardyń basym bóligi Almaty men Astana qalalarynan, sondai-aq Qostanai, Aqtóbe, Qaraǵandy jáne Batys Qazaqstan oblystarynan túsken.
Resmi málimetke sáikes, ýaqytsha aqaýǵa syrtqy internet-trafik belsendiliginiń kúrt artýy sebep bolǵan. Sonyń saldarynan Qazaqstannyń internet segmentin qorǵaý tetikteri iske qosylyp, keibir memlekettik resýrstarǵa internet arqyly kirý ýaqytsha qiyndaǵan.
Aqaý barlyq memlekettik saitty qamtymaǵan jáne qysqa ýaqytqa ǵana sozylǵan. Qazir internet-trafik qalpyna keltirildi. eGov.kz portaly men memlekettik aqparattyq júieler shtattyq rejimde jumys istep tur.
