Quryltai janynan máslihattarmen ózara is-qimyl jónindegi keńes qurylyp, ol óńirler men ortalyq memlekettik organdar arasyndaǵy bailanysty kúsheitýge baǵyttalady, dep habarlaidy dalanews.kz.
Quryltai Máslihattarmen ózara is-qimyl jónindegi keńes qurý týraly qaýly qabyldady. Jańa qurylymnyń negizgi maqsaty óńirler men ortalyq memlekettik organdar arasynda turaqty ári tikelei bailanys ornatý bolyp otyr.
Keńes máslihattardyń zańdardy ázirleý protsesine turaqty qatysýyn qamtamasyz etip, qabyldanǵan zańdardyń óńirlerde is júzinde qoldanylýy boiynsha keri bailanys jinaidy.
Sonymen qatar keńes óńirlerdegi ózekti máselelerdi anyqtap, olardy júielep, tiisti sheshimder ázirleýge yqpal etedi. Óńirlerde tiimdi júzege asqan tájiribelerdi zerdelep, olardy basqa aimaqtarǵa taratý da keńestiń mindetteriniń biri bolady.
Keńes quramyna máslihattarda jumys isteý nemese olarmen ózara is-qimyl jasaý tájiribesi bar Quryltaidyń turaqty komitetteriniń depýtattary, saiasi partiialar men memlekettik organdardyń ókilderi, sondai-aq Astana, oblystar jáne respýblikalyq mańyzy bar qalalar máslihattarynyń tóraǵalary kiredi.
Óńirlermen turaqty bailanysty qamtamasyz etý úshin Quryltaidyń tórt depýtatynan turatyn hatshylyq qurylady. Ár depýtatqa bes óńirden bekitiledi.
Qajet bolǵan jaǵdaida jekelegen máselelerdi talqylaý úshin taqyryptyq jumys toptary qurylýy múmkin. Olardyń quramyna Quryltai jáne máslihat depýtattarymen qatar sarapshylar, azamattyq qoǵam, memlekettik organdar men uiymdardyń ókilderi tartylady.
Osylaisha, jańa keńes óńirlerden túsetin usynystar men máselelerdi Quryltai deńgeiinde júieli túrde qaraýǵa jáne olardyń negizinde tiisti sheshimder ázirleýge arnalǵan turaqty alań bolmaq.
