Almaty oblysynda órtengen kúii tabylǵan 37 jastaǵy aǵa jedel ýákil Aslan Álserovtiń ólimine qatysty tergeý jalǵasyp jatyr. Syrt kózge tatý, sportpen shuǵyldanatyn ári úlgili otbasy retinde kóringen Álserovter shańyraǵy búginde qoǵamda úlken rezonans týdyrǵan isterdiń birine ainaldy, dep habarlaidy dalanews.kz.
Stan.kz tilshisi marqumnyń burynǵy áriptesi, eks-politsei Jigermen (aty ózgertilgen) sóilesip, kúdiktilerge taǵylǵan aiypqa qatysty pikirin surady. Atap aitqanda, áiel adam men jasóspirim balanyń er adamdy óltirip, denesin qolyn bailaǵan kúii qaladan 250 shaqyrym jerge aparyp tastaýy qanshalyqty múmkin ekeni týraly saýal qoiylǵan.
Jigerdiń aitýynsha, Aslan Álserovtiń jubaiy kezinde sportpen ainalysqan. Ol Ishki ister ministrligi júiesinde kúresten júldeli oryndarǵa ie bolǵanyn aitady. Sondyqtan eks-politsei kúdiktilerdi álsiz nemese qorǵansyz adamdar dep sipattaýǵa kelmeitinin jetkizdi.
"Onyń jubaiy kezinde sportpen ainalysqan. Ishki ister ministrliginiń júiesi boiynsha kúresten júldeli oryndar alǵan. Sondyqtan olardy álsiz nemese názik adamdar deýge bolmaidy. Al olarǵa taǵylǵan aiypqa kelsek, menińshe, munyń bári tergeý barysynda dáleldengen", – deidi Jiger.
Burynǵy áriptesiniń sózinshe, marqumdy ózine tiesili Chevrolet Onix kóligimen alyp ketken bolýy múmkin. Ol osy iske qatysty janarmai satyp alý jáne janarmai quiý beketindegi beinekamera jazbalary týraly estigenin aitty.
"Estigenim boiynsha, osy úshin 38 litr janarmai satyp alǵan, janarmai quiý beketindegi beinekameralar olardy túsirip alǵan. Eger ony basqa adamdar óltirse, politsiia qyzmetkerleri onyń otbasyn negizsiz aiyptai qoimas edi", – dedi eks-politsei.
Jiger qaiǵyly oqiǵaǵa otbasylyq janjal sebep bolýy yqtimal ekenin de joqqa shyǵarmaidy. Onyń pikirinshe, balalar janjal kezinde anasyna arasha túsýge tyrysqan bolýy múmkin.
"Múmkin, otbasynda janjal bolǵan shyǵar. Balalary anasyna arasha túsýi múmkin. Mysaly, uly janjal kezinde anasyn qorǵaýǵa tyrysqan shyǵar. Men Aslandy óz basym sabyrly adam ári kásibi maman retinde tanydym", – deidi ol.
Sonymen qatar burynǵy áriptesi otbasyndaǵy jaǵdaidyń syrt kózge árdaiym baiqala bermeitinin aitty. Onyń sózinshe, kei adamdar úi ishinde ozbyrlyq kórsetýi múmkin, biraq ony ainalasyndaǵylarǵa bildirmei, syrttai úlgili otbasy bolyp kórinýi yqtimal.
"Degenmen otbasynda ozbyrlyq kórsetetin adamdardyń kóbi muny syrt kózge bildirmeidi. Sondyqtan ainalasyndaǵylar olardy úlgili otbasy dep qabyldaýy múmkin", – dedi Jiger.
Eks-politsei quqyq qorǵaý organdaryndaǵy meditsinalyq jáne psihologiialyq irikteý júiesine de pikir bildirdi. Onyń aitýynsha, qazirgi tekseris adamnyń ishki psihologiialyq jaǵdaiyn tolyq anyqtaýǵa jetkiliksiz bolýy múmkin.
"Meditsinalyq komissiia bárin anyqtaityn kórsetkish emes. Al psihologiialyq testke, iaǵni kásibi-psihologiialyq irikteýge kelsek, onda bir suraqty on túrli tásilmen qaita-qaita qoiady. Mysaly, "Eger aqsha salynǵan ámiian taýyp alsańyz, ne ister edińiz?" degen siiaqty qarapaiym suraqtar. Sondyqtan bul testke tolyq senýge bolmaidy. Menińshe, ony psihikalyq aýytqýy bar adamnyń ózi de óte alady", – deidi burynǵy politsei.
Qazirgi ýaqytta Aslan Álserovtiń ólimine qatysty tergeý jalǵasyp jatyr. Oqiǵanyń naqty mán-jaiy tergeý nátijesinde anyqtalmaq.
