Mańǵystaý oblysynda 18 jastaǵy Azamat Dúisehanovty izdeý jumystary jalǵasyp jatyr. Ol 7 shildede Aqtaýdan shamamen 48 shaqyrym jerdegi O'Mir demalys kesheni mańynda joǵalyp ketken, dep habarlaidy dalanews.kz.
Týystarynyń aitýynsha, sol kúni Azamat dostarymen birge týǵan kúnin atap ótken. Saǵat 15:00 shamasynda teńiz jaǵasynda kózden tasa bolǵan, sodan beri onyń qaida ekeni belgisiz.
Izdeý jumystaryna Tótenshe jaǵdailar departamentiniń qyzmetkerleri, sondai-aq, týystary, dostary men jaqyndary jumyldyrylǵan.
Jalpy izdeý-qutqarý operatsiiasyna 53 adam, 6 tehnika, 3 júzý quraly, 10 súńgýir jáne 8 dron qatysyp jatyr.
Joǵalǵan adamnyń týystary eriktilerden, dron operatorlarynan jáne qaiyq ielerinen kómek surap otyr. Sondai-aq, 7 shildede O'Mir demalys kesheni mańynda bolǵan nemese Azamattyń júrgen jeri týraly qandai da bir málimeti bar azamattardy habarlasýǵa shaqyrdy.
