Bul týraly Azattyqqa Janbolat Mamaidyń anasy Menizat Toqpataeva telefon arqyly habarlady. Onyń sózine qaraǵanda, búgin tańerteńgi saǵat 8:30 shamasynda ózderin korrýptsiiaǵa qarsy is-qimyl biýrosynan dep tanystyrǵan birneshe adam úilerine kelip eki jarym saǵattai tintý júrgizgen.
- Búkil úige tintý jasap, barlyǵymyzdyń kiimderimizdi, Janbolattyń bólmesin túgel tekserip shyqty. Sosyn Janbolatty alyp ketti. Onymen birge qujattaryn, uialy telefonyn, kúieýimniń planshetin, kóliktiń qujattaryn alyp ketti, - dedi Menizat Toqpataeva. Ol tintýdiń ne sebepti jasalǵanyn ózi bilmeitinin aitty.
Búgin "Tribýna. Saiasi qalam" basylymynyń redaktsiiasyna da tintý jasalǵany habarlandy. Basylym jýrnalisi Inga Imanbai Facebook-te basylym redaktsiiasyna tintý júrgizýge birneshe adamnyń kelgeni týraly habarlady. Imanbai jariialaǵan videoda redaktsiiaǵa ózin jedel tergeý tobynyń tergeýshisi dep tanystyrǵan adamnyń kirgeni túsirilgen, tanystyrýdan soń video úzilip ketedi.
Basylymnyń Aqsai-1 shaǵyn aýdanynda ornalasqan redaktsiiasyna barǵan Azattyq tilshileri redaktsiia esigine qabyrǵamen biriktirip "Bekitilgen" degen jazýy bar qaǵaz japsyryp ketkenin kórdi. Qaǵazda "I.E.Imanbaeva, N.Álipbek jáne tergeýshi N.Jaqypbekov boldy" degen sóz ben búgingi kún jazylǵan. Biraq qaǵazǵa mór qoiylmaǵan.
Korrýptsiiaǵa qarsy is-qimyl ulttyq biýrosynyń baspasóz qyzmeti Azattyqqa Janbolat Mamaidyń ustalǵany týraly ázirge aqparat joǵyn aitty.
