Áleýmettik jelilerde Frantsiia prezidenti Emmanýel Makronnyń Tailand koroli Maha Vachiralongkornnyń aldynda tize búgip turǵany beinelengen sýret keńinen tarady. Alaida keiin bul fotosýrettiń jasandy intellekt kómegimen jasalǵan jalǵan material ekeni anyqtaldy.
Tailandtyń Syrtqy ister ministrligi áleýmettik jelide taraǵan aqparatty resmi túrde joqqa shyǵaryp, Frantsiia basshysy memlekettik marapatty tapsyrý kezinde eshqandai tize búgý rásimin jasamaǵanyn málimdedi.
Feik sýret memlekettik sapardan keiin taraǵan
Daýly sýret Tailand koroliniń Frantsiiaǵa jasaǵan alǵashqy memlekettik saparynan keiin jariialandy. Biyl eki el arasyndaǵy diplomatiialyq qarym-qatynastyń ornaǵanyna 170 jyl tolýyna bailanysty Parijde saltanatty qabyldaý uiymdastyrylǵan bolatyn.
Resmi málimetke sáikes, qabyldaý barysynda Emmanýel Makron Tailand koroli Maha Vachiralongkornǵa Frantsiianyń eń joǵary memlekettik nagradasy – Qurmet legiony ordeniniń Úlken krestin tabystaǵan. Al patshaiym Sýthida Ulttyq eńbegi úshin ordeniniń Úlken krestimen marapattalǵan.
Osy rásimnen keiin internette Makronnyń koroldik juptyń aldynda bir tizerlep turǵany beinelengen sýret tarai bastady. Jariialanymda bul áreket Frantsiia prezidentiniń qurmet kórsetý belgisi retinde sipattalǵan.
Myńdaǵan adam senip qalǵan
Jalǵan sýret Tailandtyń Facebook segmentinde úlken tanymaldyqqa ie bolǵan. Ol ondaǵan myń laik jinap, myńdaǵan ret bólisilgen.
Tailandtaǵy táýelsiz faktcheking uiymy COFACT málimetinshe, jariialanǵannan keiin alǵashqy bir saǵattyń ózinde sýretke júzdegen adam senip, qaita bólisken.
Pikir qaldyrǵandardyń bir bóligi Makrondy «naǵyz kóshbasshy» dep atap, onyń bul áreketin joǵary baǵalaǵan.
Resmi fotolar múlde basqa kórinisti kórsetti
Tailand Syrtqy ister ministrligi mundai oqiǵa bolmaǵanyn málimdedi.
Ministrlik taratqan resmi fotosýretterde Emmanýel Makronnyń marapatty korolge tik turǵan kúiinde tabystaǵany anyq kórinedi.
Sonymen qatar sarapshylar virýstyq sýretten birneshe sáikes kelmeitin sátterdi anyqtaǵan. Atap aitqanda, korol men patshaiymnyń kiimindegi bólshekter resmi túsirilgen fotolarmen sáikes kelmeidi.
Jasandy intellekttiń izi tabylǵan
Euronews-tiń The Cube faktcheking toby sýretti arnaiy verifikatsiia quraldary arqyly teksergen.
Tekserý barysynda sýretten SynthID tsifrlyq belgisi anyqtalǵan. Bul belgi jasandy intellekt arqyly jasalǵan kontentti belgileý úshin qoldanylady. Sondai-aq taldaý nátijesi sýrettiń OpenAI quraldarynyń kómegimen generatsiialanǵanyn kórsetken.
Mamandardyń aitýynsha, bul – Tailand koroldik otbasy týraly jasandy intellekt kómegimen jasalǵan alǵashqy jalǵan material emes.
Buǵan deiin de áleýmettik jelilerde koroldiń úlken qyzy qaitys boldy degen jalǵan aqparatpen birge hanshaiym Sirivannavaridiń jylap turǵan fotolary keńinen taraǵan. Keiin olardyń da jasandy intellekt arqyly jasalǵany dáleldengen.
