Áleýmettik jelide Mini Knopka atymen tanymal bloger Áigerim Berdalieva Almaty kósheleriniń ataýyna qatysty jazbasynan keiin synǵa qaldy. Osydan keiin Eurasian Fashion Week uiymdastyrýshylary onyń sýretterin Almatydaǵy bilbordtar men jarnama ekrandarynan alyp tastaýdy uiǵardy, dep habarlaidy dalanews.kz.
Daý qalai bastaldy?
Daýdyń bastalýyna blogerdiń Threads-tegi jazbasy sebep bolǵan. Ol Almatydaǵy birqatar kósheni burynǵy keńestik ataýlarymen ataitynyn jazyp, qazirgi ataýlaryn qoldanatyndarǵa qatysty dóreki pikir bildirgen.
Bloger Dostyqty - Lenin, Nazarbaev dańǵylyn - Fýrmanov dep ataǵan.
Áigerim Berdalievanyń jazbasy áleýmettik jelide qyzý talqyǵa túsip, oǵan qatysty syn kóbeigen.
Bloger jurttan keshirim surady
Osy jaǵdaidan keiin Eurasian Fashion Week uiymdastyrýshylary bul onyń jeke pikiri ekenin málimdegen. Buǵan deiin Áigerim Berdalieva sharanyń brend-ambassadory retinde tanystyrylǵan bolatyn.
Uiymdastyrýshylar málimdemesinde blogerdiń jeke paraqshasyndaǵy pikirin qoldamaitynyn aityp, Almatydaǵy bilbordtar men jarnama ekrandarynan onyń sýretterin alyp tastaitynyn habarlady.
Keiin Áigerim Berdalieva jazbasy úshin keshirim surady. Onyń aitýynsha, pikirin emotsiiaǵa berilip jazǵan jáne kóp uzamai óshirgen. Bloger eshkimdi renjitýdi maqsat etpegenin aityp, jaǵdaidy ári qarai ýshyqtyrmaitynyn jetkizdi.
