Jańa zelandiialyq akter, "Iýra dáýiriniń saiabaǵy" filmindegi doktor Alan Grant róli arqyly álemge tanylǵan Sem Nill 78 jasynda ómirden ótti. Bul týraly onyń týystary áleýmettik jelide habarlady, dep habarlaidy dalanews.kz.
"Sem Nilldiń otbasy onyń dúisenbi, 13 shilde kúni Avstraliianyń Sidnei qalasynda qaitys bolǵanyn zor kúizelispen habarlaidy. Sem sońǵy sátinde otbasynyń ortasynda boldy jáne búkil ómirin qalai abyroimen ótkizse, bul dúnieden de solai ótti", – delingen otbasy taratqan málimdemede.
Týystary akterdiń qazasy kútpegen jaǵdai bolǵanyn atap ótti. Sonymen qatar qaitys bolǵan kezde Nilldiń onkologiialyq aýrýy remissiia kezeńinde bolǵanyn málimdedi. Otbasy Sidneidegi St Vincent’s jekemenshik aýrýhanasynyń dárigerlerine kórsetken kómegi úshin alǵys bildirdi.
2023 jylǵy naýryzda Sem Nill ózine sirek kezdesetin qan qaterli isiginiń túri – úshinshi satydaǵy angioimmýnoblastyq T-jasýshaly limfoma diagnozy qoiylǵannan keiin himioterapiia kýrsynan ótip jatqanyn aitqan edi. Sol kezde akter aýrýdyń remissiia kezeńine ótkenin, alaida qoldaý terapiiasyn jalǵastyrý qajet ekenin habarlaǵan.
Sem Nill 1947 jylǵy 14 qyrkúiekte Soltústik Irlandiiada dúniege kelgen. Bala kezinde otbasymen birge Jańa Zelandiiaǵa qonys aýdaryp, sol elde akterlik mansabyn bastady.
Oǵan álemdik tanymaldyqty Stiven Spilbergtiń 1993 jyly jaryq kórgen "Iýra dáýiriniń saiabaǵy" filmindegi paleontolog Alan Granttyń róli ákeldi. Keiin ol bul keiipkerdi "Iýra dáýiriniń saiabaǵy 3" jáne "Iýra álemi: Bilik" filmderinde qaita somdady.
