Kaspii teńizindegi qaiǵyly oqiǵadan aman qalǵan sarbaz Aqjol Temerhannyń anasy Samal Keýelova áleýmettik jelidegi paraqshasynda uly men qaza bolǵan dosy Azamattyń dostyǵy týraly áserli jazba jariialady, dep habarlaidy dalanews.kz.
Onyń aitýynsha, qaiǵyly oqiǵadan keiin aýrýhanaǵa jetkizilgen Aqjol jan dosy Azamattyń beretin qolynan tastamaǵan.
"Ol jan dosy Azamattyń beretin qolynan tastamai, jedel járdem kóliginde ózine kómek kórsetýge kelgen feldsherlerge de: "Azamattyń beretin bermeimin…" – depti", – dep jazdy Samal Keýelova.
Aqjol qabyldaý bólimine túsken kezde de beretti eshkimge bermei, "Azamattiki… Ózim beremin" dep ustap otyrǵan.
Sarbazdyń anasynyń sózinshe, keiin meditsina qyzmetkerleri bul jaǵdaidy kózine jas alyp aityp bergen.
"Men analiz ala almadym… Beretin bermei, bárimizdi jylatty", – degen dárigerler.
Samal Keýelova osy oqiǵa ózine shynaiy dostyqtyń qadirin taǵy bir márte uqtyrǵanyn jazdy. Ol buryn Alladan balalarynyń amandyǵynan keiin olarǵa adal dos jolyqtyrýyn tileitinin eske alǵan.
"Óitkeni shynaiy dostyqtyń qadirin Aqjoldyń qolyndaǵy sol beret únsiz-aq aityp turǵandai… Allama myń da bir shúkir, meniń balamnyń, bizdiń otbasymyzdyń, endi búkil halyqtyń ómirinde Azamattyń baryna", – dep jazdy ol.
Aqjoldyń anasy jazbasynyń sońynda qaza bolǵan Azamattyń rýhyna arnap júrekjardy sózderin jetkizdi.
"Azamat balam… Jatqan jeriń jaily bolsyn. Seniń esimiń de, dostyǵyń da, jarqyn beineń de bizdiń júregimizde máńgi saqtaldy. Sen umytylmaisyń… Óitkeni sen bir ananyń balasy ǵana emes, bir dostyń júreginde máńgi qalǵan adal dossyń", – dedi Samal Keýelova.
