Qazaqstanda jeke kásipkerler (JK) 2026 jyldyń 1 naýryzyna deıin ońaılatylǵan salyq rejımin tańdaý jóninde ótinish usynýy tıis, dep habarlaıdy Dalanews.kz.
Áıtpese olar avtomatty túrde jalpyǵa birdeı belgilengen salyq rejımine kóshiriledi. Bul týraly Qarjy mınıstrligi Memlekettik kirister komıteti tóraǵasynyń orynbasary Janybek Nurjanov málimdedi.
Onyń aıtýynsha, qazirgi tańda jeke kásipker retinde jumys istep júrgen barlyq tulǵa belgilengen merzimge deıin salyq rejımin tańdaǵany jóninde habarlama joldaýy qajet.
“Eger kásipker qazir ońaılatylǵan rejımde jumys istep júrse, 1 naýryzǵa deıin osy rejımde qalatynyn rastap, habarlama tapsyrýy kerek. Al atalǵan merzimge deıin ońaılatylǵan deklarasıany tańdaý týraly habarlama bermegender avtomatty túrde jalpyǵa birdeı salyq salý rejımine aýystyrylady”, — dedi ol.
Sonymen qatar qazirgi kezde jalpyǵa birdeı rejımde jumys istep júrgen jeke kásipkerler de ońaılatylǵan rejımge kóshýge nıet bildirse, 2026 jylǵy 1 naýryzǵa deıin tıisti habarlamany jiberýi qajet.
