ishki ister ministri,
Politsiia general-leitenanty
Q.N. Qasymovqa
Qurmetti Qalmuhanbet Nurmuhanbetuly!
Men 2015 jyly Taldyqorǵan qalasynda QHR-nyń azamaty Imanáli Jazira atty qyzben tanysyp, bir-birimizdi unatyp, aldaǵy kúnderde otbasyn qurýǵa ýaǵdalasyp edik.
Ókinishke orai, bolashaq jarym Imanáli Jazira 2016 jyly 7 maýsymda QR «Ákimshilik quqyq buzýshylyq týraly» Kodeksiniń 517 babynyń 2 bóligimen kináli dep tanylyp, Qazaqstan Respýblikasynyń sheginen ákimshilik jolmen shyǵarylyp jiberildi.
Eń qiyny, «Halyqtyń kóshi-qony týraly» (2011 jylǵy 22 shildedegi № 477-IV) Zańynyń 49-babynyń «5) Qazaqstan Respýblikasynyń sheteldikterdiń quqyqtyq jaǵdaiy týraly zańnamasyn birneshe ret buzǵan;» degen normasy eskerilmesten, birinshi márte ákimshilik quqyq buzǵany úshin Qazaqstan Respýblikasynyń sheginen ákimshilik jolmen shyǵarylyp jiberilgeni bolyp tur.
Mine, sodan beri bir jyl ótti. Endi tórt jyly bar. Sóz bergen soń, jigit adam ýádesinde turý kerek! Jaqynda QHR-ǵa baryp, Imanáli Jaziramen zańdy nekege turyp keldim. Shynymdy aitsam, tórt jyl tosý men úshin ońaiǵa soǵyp turǵan joq. Beibit kúnde eski zamannyń qatal zańyna ushyraǵan ǵashyqtardyń kúiin keshý qiyn eken, Qalmuhanbet aǵatai!
Onyń ústine, úidegi uldyń kenjesi edim. Ákem Nursapa Tursyn miyna qan quiylyp, aýyryp jatyr. Meniń toiymdy jasap, qyzyǵymdy kórip ketsem dep kúnde armandaidy. Halqymyzda «Eki jasty qosqan alǵys alady, eki jasty aiyrǵan qarǵys alady!» degen ataly sóz baryn jaqsy bilesiz.
Búgin «Nur Otan» partiiasy respýblikalyq qoǵamdyq qabyldaý bólmesinde Sizdiń orynbasaryńyz R.T. Jaqypovtyń qabyldaýda bolyp, osy hatty tapsyrdym.
QR Ishki ister ministri laýazymyńyzben, Politsiia general-maiory mártebeńizben meniń sharýamdy óz qolyńyzǵa alyp, alysta qalǵan kelinińizdiń Atajurtyna oralýyna, syńaryna qosylýyna kómektesýińizdi ótine suraimyn!
Sonymen qatar Sizdi ómirde bir ret qana bolatyn otbasyn qurý toiymyzdyń qurmetti qonaǵy bolýǵa shaqyram!
Tursyn Bóribai
