AQSh-ta Kaliforniia shtatynyń San-Diego qalasyndaǵy meshitte bolǵan atys saldarynan bes adam qaza tapty, dep habarlaidy dalanews.kz.
Qaiǵyly oqiǵa 18 mamyrda jergilikti ýaqytpen tańǵy 11:40 shamasynda bolǵan. Politsiia oqiǵa ornyna jedel jetip, jaǵdai baqylaýǵa alynǵanyn habarlady.
Qala politsiiasynyń basshysy Skott Ýoldyń aitýynsha, qaza tapqandar arasynda meshittiń kúzetshisi de bar. Aldyn ala málimet boiynsha kúdiktiler ózderine qol jumsaǵan bolýy múmkin. Sondai-aq, birneshe adam túrli jaraqatpen aýrýhanaǵa jetkizilgen.
Politsiia shabýyldy dini óshpendilik negizinde jasalǵan qylmys retinde qarastyryp jatyr. Sebebi qarýly shabýyl dini nysan aýmaǵynda bolǵan.
Oqiǵa meshit pen mektep ornalasqan keshende tirkelgen. Shabýyl kezinde ǵimarat ishinde balalar da bolǵan. Alaida olardyń barlyǵy qaýipsiz jerge evakýatsiialanyp, zardap shekpegen. Mektepte arab tili, islamtaný jáne Quran sabaqtary ótip jatqan.
Quqyq qorǵaý organdary málimetinshe, keiin oqiǵa ornynan birneshe kvartal jerden kóliktiń ishinen 17 jáne 19 jastaǵy eki jigit óli tabylǵan. Olar ózderine oq atqan degen boljam bar.
