Iran prezidenti Masýd Pezeshkian mingen ushaq Qyrǵyzstannan qaitar jolda baǵytyn ózgertip, eldiń soltústigindegi Resht qalasynyń Sardar-e Djangal halyqaralyq áýejaiyna qondy. Bul týraly irandyq BAQ habarlady.
Ushaq bortynda Irannyń syrtqy ister ministri Abbas Arakchi men sport jáne jastar ministri Ahmad Doniamali da bolǵan.
Birqatar irandyq aqparat quraldary baǵyttyń ózgerýin Tegerannyń shyǵys bóliginde áýe shabýylyna qarsy qorǵanys júieleriniń iske qosylýymen bailanystyrdy. Mehr agenttiginiń habarlaýynsha, 1 qyrkúiek keshinde Iran astanasynyń shyǵysynda áýe qorǵanysy júieleri belsendi jumys istegen.
Izraildiń 12-arnasy Iran prezidentiniń ushaǵy shuǵyl qondy dep habarlady.
Alaida Irannyń memlekettik IRNA agenttigi bul aqparatty rastamady. Agenttik ushaqtyń Resht qalasyna qonýyn Qyrǵyzstannan qaitar joldaǵy qysqa aialdama dep sipattady.
IRNA málimetinshe, prezident ushaǵy áýejaida birneshe saǵat turǵan. Osy ýaqyt aralyǵynda Gilian provintsiiasynyń gýbernatory Hadi Hakshenas Masýd Pezeshkianǵa óńirdegi jaǵdai men eldi qajetti taýarlarmen qamtamasyz etý sharalary týraly baiandaǵan.
Sondai-aq gýbernator provintsiianyń saýda, kólik jáne logistikalyq múmkindikteri jóninde aqparat bergen.
Ázirge Iran biligi prezident ushaǵynyń shuǵyl qonǵanyn resmi túrde rastaǵan joq. Ushaqtyń ne sebepti bastapqy baǵytyn ózgertkeni de naqty aitylmady.
