15 jáne 16 qazanda Almatyda ótetin BE WOMAN ASIA 2026 halyqaralyq forýmy álemniń 25 elinen kásipkerlerdi, ǵalymdardy, tehnologiia mamandaryn, qoǵam qairatkerleri men mádeniet ókilderin bir alańǵa jinaidy. “Etika kúshi” taqyrybyna arnalǵan biylǵy basqosýda jasandy intellekt dáýirindegi jaýapkershilik, biznestegi adamgershilik qaǵidalar, áielderdiń qoǵamdyq ózgeristerge yqpaly jáne jańa tehnologiialardyń bolashaǵy talqylanady. Osy oraida Dalanews.kz redaktsiiasy sahnaǵa shyǵatyn álemdik spikerlerdiń ómir joly men eleýli eńbekterine sholý jasady.
Biyl forýmǵa júzge jýyq spiker qatysady. Olardyń arasynda internettiń alǵashqy damý kezeńine aralasqan injener, eki ret “Oskar” alǵan rejisser, esimin álemdik brendke ainaldyrǵan kásipker jáne jasandy intellektini retteý máselesimen ainalysyp júrgen halyqaralyq sarapshylar bar. Negizgi baǵdarlama 15 qazanda Respýblika saraiynda ótse, 16 qazanda Gorky Park Residence alańynda tájiribelik sabaqtar, pikirtalastar men jabyq kezdesýler uiymdastyrylady.
Áleýmettik jeliniń qalyptasýyna úles qosqan kásipker
Rendi Tsýkerbergti kópshilik Meta kompaniiasynyń negizin qalaýshy Mark Tsýkerbergtiń ápkesi retinde tanidy. Alaida onyń tehnologiia salasyndaǵy joly týystyq bailanyspen ǵana shektelmeidi. Ol Facebook kompaniiasynyń alǵashqy qyzmetkerleriniń biri bolyp, platformanyń marketingtik baǵytyn damytýǵa jáne tikelei efir formatynyń qalyptasýyna atsalysty.
Facebook álemdik áleýmettik jelige ainalǵan kezeńde Rendi Tsýkerberg tsifrlyq kommýnikatsiianyń qoǵam men bizneske qalai áser etkenin ishinen baqylady. Keiin kompaniiadan ketip, Zuckerberg Media jobasyn qurdy. Qazir ol tehnologiia, media, kásipkerlik jáne tsifrlyq mádeniet máselelerin zerttep júr.
Onyń tájiribesi tehnologiia damyǵan saiyn týyndaityn jaýapkershilik máselesine nazar aýdartady. Áleýmettik jeliler adamdardy jaqyndastyrǵanymen, aqparattyq qysym, internetke táýeldilik jáne jeke málimetterdiń qaýipsizdigi sekildi jańa túitkilderdi de alǵa shyǵardy. BE WOMAN ASIA forýmynda osy máselelerge qatysty mańyzdy oilar aitylmaq.
Áielder únin kino arqyly álemge estirtken rejisser
Pákistandyq rejisser ári jýrnalist Sharmin Obeid-Chinoi kinony kóńil kóterý quraly emes, qoǵamdaǵy ádiletsizdikti kórsetetin minberge ainaldyrdy. Onyń derekti filmderinde áielderge jasalatyn zorlyq, áleýmettik teńsizdik jáne adam quqyǵy máseleleri kóteriledi.
Rejisser Saving Face jáne A Girl in the River: The Price of Forgiveness derekti filmderi úshin eki ret “Oskar” syilyǵyn ielendi. Ekinshi týyndyda óz otbasy tarapynan jasalǵan qastandyqtan aman qalǵan jas qyzdyń taǵdyry baiandalady. Film Pákistandaǵy áielderge qarsy zorlyq máselesin halyqaralyq deńgeige shyǵaryp, el ishinde qoǵamdyq pikirtalas týǵyzdy.
Óz esimin álemdik brendke ainaldyrǵan kásipker
Britandyq parfiýmer Djo Meloýnnyń kásipkerlik joly úlken keńseden nemese qomaqty investitsiiadan bastalǵan joq. Ol alǵashqy ónimderin shaǵyn kólemde daiyndap, klientterine ózi usyndy. Keiin onyń esimi álemdegi eń tanymal parfiým brendteriniń birine ainaldy.
1999 jyly kásipker Jo Malone London kompaniiasyn Estée Lauder korporatsiiasyna satty. Arada birneshe jyl ótkende oǵan sút bezi qaterli isigi diagnozy qoiylyp, em qabyldaý kezinde iis sezý qabiletinen ýaqytsha aiyryldy. Bul parfiýmer úshin kásibi jolynyń aiaqtalýymen teń aýyr synaq edi. Soǵan qaramastan ol shyǵarmashylyqqa qaita oralyp, 2011 jyly Jo Loves atty jańa brendin qurdy.
Onyń tájiribesi forýmdaǵy kásipkerlik, ishki tirek pen jańa bastama taqyryptaryna ózgeshe mazmun beretini anyq.
Tsifrlyq tehnologiianyń damýyna jol ashqan injener
Búginde kez kelgen aqparatqa bir batyrmany basý arqyly qol jetkizý qalypty kórinedi. Alaida internettiń alǵashqy jyldarynda mátin men beineni bir keńistikte kórsetý úlken tehnologiialyq jańalyq bolatyn. Sol ózgeristiń bastaýynda turǵan mamandardyń biri Ping Fý edi.
Ol alǵashqy grafikalyq internet braýzerleriniń biri sanalatyn Mosaic jobasy ázirlengen ortada eńbek etti. Keiin úsh ólshemdi beineleý tehnologiialarymen ainalysatyn Geomagic kompaniiasyn quryp, óndiris pen tsifrlyq modeldeýdiń damýyna úles qosty. Kompaniianyń tehnologiialary ónimderdi jobalaý men daiyndaý tásilderin ózgertýge baǵyttaldy.
Pin Fýdyń kásibi joly tehnologiianyń bir sátte paida bolmaitynyn kórsetedi. Qazir kúndelikti qoldanyp júrgen tsifrlyq múmkindikterdiń artynda uzaq izdenis, táýekel jáne sátsizdikten keiin qaita tura bilý qabileti jatyr.
Áielderge tehnologiia áleminiń esigin ashqan kóshbasshy
Aiými Mýr Aoki Women in Tech Global halyqaralyq uiymyn quryp, áielderdiń tehnologiialyq bilim alýyna, kásip bastaýyna jáne osy saladaǵy basshylyq qyzmetterge aralasýyna múmkindik beretin bastamalardy damytyp keledi.
Onyń kóteretin máselesi tek áielderdiń IT salasyndaǵy úlesin arttyrýmen shektelmeidi. Jasandy intellekt pen tsifrlyq ónimderdi kimder ázirleidi, algoritmderde kimderdiń múddesi eskeriledi jáne tehnologiianyń igiligi qoǵamnyń barlyq tobyna birdei jete me degen saýaldar da osy baǵytpen bailanysty.
Forýmnyń ekinshi kúninde Almatyda alǵash ret Women in Tech paneldik sessiiasy ótedi. Oǵan túrli eldiń ókilderi qatysyp, tehnologiia shekaralardy ózgertken kezde adamǵa tiesili qundylyqtardy qalai saqtaý keregin talqylaidy.
Jasandy intellekt salasynyń sarapshysy
Jasandy intellekt búginde adamnyń kúndelikti turmysymen ǵana shektelmei, jumysqa qabyldaý, nesie berý, bilim alý jáne meditsinalyq kómek kórsetý sekildi mańyzdy salalarǵa aralasa bastady. Biraq algoritm qate sheshim shyǵarsa nemese belgili bir topty kemsitse, jaýapkershilikti kim arqalaidy?
Osy máseleni halyqaralyq deńgeide kóterip júrgen mamandardyń biri Titi Akinsanmi. Ol jasandy intellekt, tsifrlyq saiasat jáne tehnologiiany retteý salasynda jumys isteidi. Sarapshy tehnologiialyq damý qoǵamdaǵy teńsizdikti tereńdetpeýi úshin tsifrlyq sheshimderdi ázirleý kezinde adamnyń quqyǵy men qaýipsizdigi eskerilýi kerek degen ustanymdy alǵa tartady.
Forým aiasynda Titi Akinsanmi tehnologiialyq ortadaǵy inkliýzivtilik máselesine arnalǵan dóńgelek ústel ótkizedi. Onda tsifrlyq ózgerister kezinde kimniń múmkindikke ie bolyp, kimniń nazardan tys qalatyny sóz bolady.
Kásipker áielderge jol ashqan kóshbasshy
Kiara Koratstsa áielderdiń ekonomika men basqarý salasyndaǵy múmkindigin keńeitýge baǵyttalǵan halyqaralyq bastamalarǵa qatysyp keledi. Onyń qyzmeti kásipker áielderdi qoldaýmen qatar, sheshim qabyldaityn qurylymdarda olardyń ókildigin arttyrýdy qamtidy.
Bul másele áielderge arnalǵan jeke baǵdarlamalar uiymdastyrýdan áldeqaida aýqymdy. Kiara Koratstsa basshylyq qyzmetterdegi áielderdiń úlesin arttyrý, olardyń qarjy men investitsiiaǵa qol jetkizýine jaǵdai jasaý jáne kásibi ortadaǵy kedergilerdi azaitý máselelerine nazar aýdarady.
Ǵaryshqa jol tartqan tuńǵysh qazaqstandyq áiel
Forým spikerleriniń arasynda ǵaryshqa ushqan tuńǵysh qazaqstandyq áiel Danna Qaraǵusova da bar.
Ǵaryshqa ushý úlken jaýapkershilikti, jan-jaqty daiyndyqty jáne psihologiialyq tózimdilikti talap etedi. Danna Qaraǵusovanyń bul qadamy buryn qoljetpestei kóringen biikterge adamnyń batyldyq pen tabandylyq arqyly jete alatynyn kórsetti.
Onyń BE WOMAN ASIA forýmyna qatysýy ǵylym, tehnologiia jáne áielderdiń jańa salalardy igerýi týraly áńgimeni Qazaqstannyń tájiribesimen sabaqtastyrady. Sondai-aq ol maqsatqa jetý jolyndaǵy daiyndyq, qorqynyshty jeńý jáne óz múmkindigińe sený týraly oi bólispek.
