Búgin - elimiz úshin mańyzdy kún. Jańa Konstitýtsiia qabyldanǵannan keiin alǵash ret Quryltai depýtattary, iaǵni eldiń bir palataly Parlamenti ókilderi sailanyp jatyr. Bul týraly Qaraǵandy oblysynyń ákimi Ermaǵanbet Bólekpaev aitty, dep habarlaidy dalanews.kz.
Ákimniń sózinshe, memlekette "Zań jáne tártip" qaǵidaty, memlekettik institýttardyń tiimdiligi, azamattardyń tańdaýyna qurmetpen qaraý jáne olardyń zańdy quqyǵyn qorǵaý basty qundylyqtarǵa ainalyp keledi.
"Búgingi tańda bizdiń árqaisymyz bul úderiske óz úlesimizdi qosa alamyz. Ol úshin sailaý ýchaskesine kelip, óz tańdaýymyzdy jasaýymyz kerek. Bul kún jastarymyz úshin de mańyzdy. Sizder bolashaqtaryńyz úshin daýys berip, azamattyq jaýapkershilik tanyta alasyzdar", - dedi Ermaǵanbet Bólekpaev.
Qaraǵandy oblysynda barlyǵy 639 sailaý ýchaskesi jumys istep jatyr. Onyń tórteýi alǵash ret ónerkásiptik kásiporyndar aýmaǵynda ashyldy. Eki ýchaske Qarmet kásipornynda, taǵy ekeýi Balqashtaǵy Kazakhmys Smelting pen Nura aýdanyndaǵy "Shubarkól kómir" kásipornynda ornalasqan.
Bul jumysshylarǵa óndiris ornynan shyqpai-aq ózderiniń sailaý quqyǵyn júzege asyrýǵa múmkindik beredi.
Ermaǵanbet Bólekpaevtyń aitýynsha, oblysta ár turǵynnyń sailaýǵa qatysýyna qolaily jaǵdai jasalǵan.
