Eks-sport vitse-ministri Erlan Qojaǵapanov 1 milliard teńge kólemindegi qarjy jymqyrý isi boiynsha qyzmettik ókilettigin asyra paidalandy dep tanylyp, 3 jylǵa bas bostandyǵynan aiyryldy, dep habarlaidy Dalanews.kz.
Astanadaǵy qylmystyq ister jónindegi sot burynǵy mádeniet jáne sport vitse-ministri Erlan Qojaǵapanovty 3 jylǵa bas bostandyǵynan aiyrý týraly úkim shyǵardy.
Qojaǵapanovqa QR Qylmystyq kodeksiniń 361-baby, 4-bóligi – "Qyzmettik ókilettikti asyra paidalaný, aýyr saldarǵa ákelgen áreket" boiynsha aiyp taǵyldy.
Aiyp 2018 jyly ótken Qazaqstan men Resei arasyndaǵy óńiraralyq yntymaqtastyq forýmyn uiymdastyrýǵa bólingen 1 milliard teńgeni jymqyrý isine bailanysty qozǵaldy.
Istiń ekinshi figýranty – forýmdy uiymdastyrǵan Success K kompaniiasynyń basshysy Lázzat Kókkózova QR QK-niń 190-baby, 4-bóligi – "Asa iri kólemdegi alaiaqtyq" baby boiynsha 5 jylǵa sottaldy.
Qojaǵapanovqa qatysty sot protsesi 5 aidan astam ýaqytqa sozyldy. Ol ózine taǵylǵan aiyptardyń saiasi astary baryn, kýálarǵa qysym kórsetilgenin aityp, tipti isti neirojúiege berip, ádil sheshim shyǵarý kerek degen usynys ta jasaǵan.
Eske salaiyq, buǵan deiin mádeniet jáne sport ministriniń burynǵy orynbasary Erlan Qojaǵapanov sottaǵy jaryssóz kezinde ózine taǵylǵan aiyptardy joqqa shyǵaryp, tergeý barysyn synǵa alǵan edi. Ol tergeý isiniń qoldan qurastyrylǵanyn, al kýálarǵa qysym jasalǵanyn málimdedi. Bul týraly Dalanews.kz Bes.media-ǵa siltep habarlady.
Qojaǵapanovtyń aitýynsha, oǵan taǵylǵan aiyptar kýágerlerdiń óz kórsetýlerimen-aq teriske shyqqan, onyń ishinde memlekettik aiyptaýshy taraptyń kýálary da bar.
“Sońǵy bes aidaǵy 50 sot otyrysyn elemegendei. Kýálardyń kóz jasyn, ‘tsirk’, ‘mazaq’ degen sózderdi umytyp ketkendei. Prokýror usynǵan qujattarǵa siz de kúldińiz, qurmetti sýdia. (...) Kýálar shyndyqty aitty, al ol shyndyq tergeý organdarynyń aitqandaryn túgel joqqa shyǵarady,” – dedi Qojaǵapanov.
Sondai-aq, ol forým smetasyn eseptegen sarapshylardyń biri 1000 dollar alǵanyn, al ekinshisi buǵan deiin memlekettik satyp alýlarǵa qatysý kezinde adal emes dep tanylǵanyn aitty. Biraq bul jaittar tergeýde eskerilmegen.
Qojaǵapanovtyń sózinshe, kýálar antikor qyzmetkerleriniń qysymy men qorqytýyna ushyraǵan. Ol bul qyzmetkerlerdiń jumystan bosatylýyn talap etti.
“Men eshkimniń túrmede otyrǵanyn qalamaimyn, biraq bul adamdar jumystan ketýi kerek. Olar Antikordyń bedeline nuqsan keltirýde. Olar – azaptaý, bopsalaý, para berý men alý, balany qaýipke qaldyrý, baspananyń jeke qolsuǵylmaýshylyǵyn buzý siiaqty alty bap boiynsha jaýapqa tartylýy kerek,” – dedi ol.
Qojaǵapanov 2,3 mlrd teńge kólemindegi jobany qarjylandyrýǵa qol qoiǵanyn joqqa shyǵarmaidy, biraq bul tek formaldy rásim bolǵanyn, barlyq esepter profildik komitetpen jasalyp, ministr men Qarjy ministrligimen kelisilgenin aitty.
“Eger vitse-ministrler smetany tekserýi kerek bolsa, ony laýazymdyq nusqaýlyqqa engizý qajet. Men tek bekitilgen qujatqa qol qoidym. Bul – meniń mindetim,” – dedi ol.
Sottaǵy basty suraqtardyń biri – Qojaǵapanov Success kompaniiasyn forýmy uiymdastyrý úshin lobbiledi me? Buǵan ol jaýap berdi:
“Men bul kompaniiany lobbilegen joqpyn. 14 mamyrdaǵy jinalysta basqa balamalar qaralmady. Success jalǵyz úmitker boldy, ony komitettiń ózi usyndy. Men tek sol sheshimmen kelistim,” – dedi ol.
Onyń aitýynsha, Success-tiń qajetti tájiribesi men tehnikalyq múmkindikteri bolǵan. Al kompaniiamen bailanysty kúdik týǵyzatyn hat almasýlarda Qojaǵapanovtyń aty múlde kezdespeidi.
Qojaǵapanovtyń aitýynsha, forýmǵa bólingen qarajatqa ótinim berý – onyń mindeti bolǵan, biraq tek ministr bekitip, Úkimetke joldaǵan soń ǵana. Al smeta – profildik komitettiń quzyrynda.
“Mende smetany tekseretin qural da, quzyret te bolǵan joq,” – dedi ol.
Qojaǵapanov sottan:
Aiyptaýdy dáleldenbegen dep tanýdy;
Jýaspai men Kokkozova arasyndaǵy hat almasýdy aiǵaq retinde qabyldaýdy;
Tergeýshiler, sarapshylar men kýálardyń áreketterin tekserýdi surap, jeke qaýly shyǵarýdy talap etti.
“Men óz kinásizdigimdi tolyq dáleldedim. Meniń áreketterimde eshqandai ókilettikti asyra paidalaný bolǵan joq,” – dedi ol.
Erlan Qojaǵapanov – QK 361-baby 4-bóligi boiynsha ("aýyr zardaptarǵa ákelgen laýazymdyq ókilettikterdi asyra paidalaný");
Liazzat Kókkózova (Success kompaniiasynyń basshysy) – QK 189-baby 4-bóligi boiynsha ("erekshe iri kólemde senip tapsyrylǵan múlikti iemdený nemese ysyrap etý").
2018 jyly Petropavlda Qazaqstan men Resei arasyndaǵy óńiraralyq yntymaqtastyq forýmy ótken. Oǵan Qazaqstannyń sol kezdegi prezidenti Nursultan Nazarbaev pen Resei prezidenti Vladimir Pýtin qatysqan. Forýmǵa daiyndyq sheńberinde qalada Oqýshylar saraiy men Tennis ortalyǵy salynǵan. Jobaǵa shamamen 1 mlrd teńge bólingen. Qojaǵapanov bul is boiynsha 2024 jyly, forýmnan alty jyl ótken soń ustaldy.
