Búgin Almaty qalasynda belgili akter Djeki Channyń qatysýymen túsiriletin Armour of God: Ultimatum («Dospehi boga: Ýltimatým») halyqaralyq kórkem filminiń óndirisin resmi túrde bastaý rásimi ótti, dep habarlaidy dalanews.kz.
Saltanatty is-sharaǵa QR Premer-Ministriniń orynbasary – Mádeniet jáne aqparat ministri Aida Balaeva, Almaty qalasynyń ákimi Darhan Satybaldy, Almaty oblysynyń ákimi Marat Sultanǵaziev, sondai-aq qazaqstandyq jáne halyqaralyq kinoindýstriia ókilderi qatysty.
Úkimet basshysynyń orynbasary Djeki Channyń Qazaqstan men Qytai arasyndaǵy mádeni-gýmanitarlyq bailanystardy damytýǵa qosyp otyrǵan úlesin joǵary baǵalady.
«Qazaqstan mádenietin álemdik arenada tanytýǵa jáne eki el arasyndaǵy mádeni-gýmanitarlyq bailanysty nyǵaitýǵa qosyp otyrǵan úlesińiz úshin Sizge alǵys bildiremin. Aldaǵy túsirilim jumystaryna sáttilik, jańa shyǵarmashylyq tabystar tileimin», – dedi Aida Balaeva.
Kezdesý barysynda Djeki Chan Almatynyń talantty jas sýretshilerimen jáne T. Júrgenov atyndaǵy Qazaq ulttyq óner akademiiasynyń túlekteri – jas kinematografistermen áńgimelesti. Ol jastarǵa shyǵarmashylyq jolda tabys tilep, úzdiksiz izdenis pen óz isine degen súiispenshiliktiń mańyzyn atap ótti. Kezdesý sońynda balalar áigili akterge ózderi salǵan portretterdi tartý etti.
Is-shara sońynda qatysýshylar dástúrli túsirilim taqtaishasymen estelik sýretke tústi. Osylaisha film óndirisiniń resmi bastalǵany aishyqtaldy.
Joba QR Mádeniet jáne aqparat ministrliginiń jáne Qytaidyń memlekettik kinokompaniiasy China Film Group Corporation-nyń qoldaýymen júzege asyrylýda. Film óndirisimen qazaqstandyq Sálem Entertainment kompaniiasy jáne gonkongtyq Billion Target kompaniiasy ainalysady.
Film túsirilimi 2026 jylǵy shilde men qazan ailary aralyǵynda Qazaqstan aýmaǵynda ótedi. Kartinanyń qoiýshy rejisseri – qazaqstandyq Robert Kýn. Týyndy keń halyqaralyq prokatqa baǵyttalǵan. Negizgi túsirilim alańdary Almaty qalasynda, Almaty jáne Mańǵystaý oblystarynda ornalasady.
Bul joba Qazaqstan úshin strategiialyq ári imidjdik turǵydan mańyzdy. Onyń júzege asyrylýy elimizdiń mádeni, týristik jáne investitsiialyq áleýetin ilgeriletýge, kinotýrizmdi damytýǵa, halyqaralyq yntymaqtastyqty nyǵaitýǵa jáne Qazaqstandy álemdik deńgeidegi iri kinojobalardy túsirýge qolaily zamanaýi alań retinde keńinen tanytýǵa yqpal etedi.
