Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda Daniiar Eleýsinovke qatysty ákimshilik quqyq buzýshylyq týraly is qaraldy, dep habarlaidy dalanews.kz.
Sotta Eleýsinov alkogoldik masań kúide avtokólikti basqaryp, Astana qalasynyń kóshelerimen avtokólikti basqaryp kele jatyp 3 jol-kólik oqiǵasyn jasaǵany anyqtalǵan.
Jol júrisi qaǵidalarynyń talaptaryn buzý saldarynan júrgizýshi:
- jerasty avtoturaǵy qaqpasynyń tiregine soqtyǵysqan;
- basqa avtokólikpen soqtyǵysyp, inertsiianyń áserinen taǵy bir avtokólikke soǵylǵan;
- keiinnen Kia Sportage avtokóligimen soqtyǵysyp, soqqynyń áserinen atalǵan avtokólik Toyota Hilux avtokóligine soǵylǵan.
Jol-kólik oqiǵalarynyń saldarynan kólik quraldaryna mehanikalyq zaqym keltirilip, materialdyq shyǵyn keltirilgen. Quqyq buzýshynyń kinási is materialdarymen, onyń ishinde meditsinalyq kýálandyrý qorytyndysymen dáleldendi. Atalǵan qorytyndyǵa sáikes boksshyda alkogoldik masańdyqtyń jeńil dárejesi anyqtalǵan. Sonymen qatar kinási ákimshilik quqyq buzýshylyq týraly hattamalarmen, jol-kólik oqiǵalarynyń syzbalarymen, beinejazbalarmen, oqiǵaǵa qatysýshylardyń túsiniktemelerimen jáne sotta zerttelgen ózge de dáleldemelermen rastaldy.
Eleýsinovtiń áreketi Qazaqstan Respýblikasy ÁQBtK-niń 608-babynyń 3-bóligi boiynsha saralandy. Bul baptyń sanktsiiasy 20 táýlik merzimge ákimshilik qamaqqa alýdy jáne 7 jyl merzimge kólik quraldaryn basqarý quqyǵynan aiyrýdy kózdeidi.
Sot otyrysynda Eleýsinov óz kinásin tolyq moiyndaǵan. Sot ÁQBtK-niń 50-babynyń 2-bóliginde kózdelgen ákimshilik qamaqty qoldanýǵa kedergi keltiretin mán-jailardy anyqtaǵan joq.
ÁQBtK-niń 608-baby 3-bóliginiń sanktsiiasy balamasyz bolǵandyqtan, sot Eleýsinovke 20 táýlik merzimge ákimshilik qamaqqa alý jáne 7 jyl merzimge kólik quraldaryn basqarý quqyǵynan aiyrý túrindegi ákimshilik jaza taǵaiyndady.
Qaýly zańdy kúshine engen joq.
