Qoǵamda úlken rezonans týdyrǵan "Bishimbaev isine" uqsas jaǵdaidy sýretteitin "Jaýap ber" filmi qazaqstandyqtarǵa endi qoljetimdi, dep habarlaidy Dalanews.kz.
Atalǵan týyndydaǵy oqiǵa jelisi belgili kásipkermen qarym-qatynasta bolǵan jas áielge qatysty sot protsesi tóńireginde órbidi. Siýjetke sáikes, otbasylyq janjal kezinde er adam qaza taýyp, onyń ólimi qoǵamda úlken daý týdyrady.
Kóptegen jeli qoldanýshylary filmdegi basty keiipker – áiel adam sot aldynda jaýap berip jatqanyna qaramastan, bul týyndy shynaiy ómirdegi Saltanattyń isin eske salady deidi. Kartinada kýágerlerdiń aiǵaqtary, zorlyq-zombylyq kórinisteri men belgili azamattyń súiiktisine kórsetken agressiiasy – barlyǵy derlik atyshýly isti qaita jańǵyrtqandai áser qaldyrady.
"Biz bul filmdi búkil el bolyp kúttik", – dep jazady kórermender.
Film ne jaiynda?
Siýjet boiynsha, maýsym aiynyń bir kúninde búkil eldi dúr silkindirgen oqiǵa oryn alady. Teledidardan atyshýly jańalyq taraidy: tanymal bloger Diana Ospanova (rólde — Arýjan Bekbolat) kúieýin (Beibit Qusaiynov) óltirdi degen kúdikke ilinedi. Ózi aýyr halde aýrýhanada jatyr jáne qylmys jasaǵanyn moiyndamaidy. Alaida qoǵam ony birden aiyptap úlgeredi: sebebi Diana barǵa ielik etedi, ishimdik ishedi, minezi ótkir, syrtqy bedeli de minsiz emes.
Ony qorǵaýǵa tanymal advokat Janar (Ásel Qalieva) kirisedi. Alaida isti jeńip shyǵý úshin nemese qorǵaýyndaǵy áielge barynsha jeńil jaza taǵaiyndalýy úshin advokattyń kóp ter tógýine týra keledi. Qarsy tarap — qatań ári tájiribeli prokýror Sandýǵash (Madina Aqylbekova), al isti qaraityn sýdia Raýshan (Ainur Bolat) – sýyqqandy, printsipshil adam.
Jábirlenýshi tarapta — qaza tapqan jigittiń qaryndasy (rólde — Nurai Jetkergen). Ol aǵasynyń ólimine kináli dep tapqan adamǵa aýyr jaza talap etedi.
Eske salaiyq, buǵan deiin azamattyq nekedegi áieli Saltanat Núkenovany óltrdi dep aiyptalǵan Qýandyq Bishimbaev 24 jylǵa, inisi Baqytjan Baijanov 4 jylǵa sottalǵan bolatyn.
Qýandyq Bishimbaev eń joǵary qaýipsizdik mekemesinde jazasyn ótep jatyr.
Buǵan deiin de QAJK ókilderi koloniiada eks-ministr úshin qolaily oryn áli bos emes ekenin, sondyqtan jumysqa turmaǵanyn málimdedi.
Al 12 qarashada apelliatsiialyq alqa Qýandyq Bishimbaevty ata-ana quqyǵynan aiyrý týraly shaǵymmen onyń burynǵy áieliniń talap aryzyn qarady.
Sot málimetinshe, eks-ministr balalarynyń tegin ózgertýine qarsy bolmady, alaida ony ata-ana quqyǵynan aiyrmady.
