Tanymal bloger ári kásipker Beibit Álibekov ákesi Baqyt Álibekovtiń áleýmettik jelidegi daýly jazbalaryna qatysty pikir bildirdi. Ol ákesiniń kózqarasyn qoldamaitynyn jáne ekeýin bir tulǵa retinde qabyldamaý keregin aitty, dep habarlaidy dalanews.kz.
Buǵan deiin áleýmettik jelide Baqyt Álibekovtiń Facebook paraqshasyndaǵy jazbalardyń skrinshottary taraǵan. Jazbalardyń birinde ol Resei, Qytai, Ózbekstan, Belarýs jáne basqa da postkeńestik ári Aziia elderinen keletin taýarlarǵa qarsy adamdardy kemsitetin sózdermen ataǵan. Sondai-aq Batys elderin qoldaityn azamattarǵa qatysty ádepsiz ári qorlaityn pikir bildirgen.
"Óresi tar, satqyn “qazanbastar” quramynda Reseidiń, Qytaidyń, Ózbekstannyń, Belarýstiń jáne basqa da postkeńestik ári Aziia elderiniń úlesi bar býrger, kofe, shujyq, irimshik, mai jáne ózge de ónimderge ǵana úre alady", - dep jazǵan Baqyt Álibekov.
Jazbanyń sońynda ol AQSh pen birqatar Batys elderin jaqtaityn adamdardy turpaiy sózdermen synaǵan. Bul pikir kópshiliktiń narazylyǵyn týǵyzyp, jeli qoldanýshylary Beibit Álibekovten de túsinikteme berýdi talap etken.
Bloger ákesiniń ustanymy men óziniń kózqarasyn bir-birimen bailanystyrmaýǵa shaqyrdy.
"Barlyǵymyz ata-anany tańdamaimyz, olar da bizdi tańdai almaityny anyq. Ákemniń kózqarastary men pikirlerin eshqashan qoldaǵan emespin jáne bul týraly birneshe ret ashyq aittym. Meniń de eresek jasqa jetip qalǵan balalarym bar, eresek adammyn. Ákem jáne men eki bólek tulǵa ekenimizdi umytpaǵan jón shyǵar", - dedi Beibit Álibekov.
Ol ár adamnyń jeke ustanymy men pikir bildirýge quqyǵy bar ekenin atap ótti. Alaida ózi tek aitqan sózi, áreketi jáne kózqarasy úshin jaýap bere alatynyn jetkizdi.
"Ár adamnyń óz ustanymy men pikiri bolýǵa quqyǵy bar. Biraq men óz sózime, is-áreketime jáne kózqarasyma ǵana jaýap bere alamyn", - dep jazdy bloger.
