Shilde aiynyń alǵashqy jeksenbisinde Batys Qazaqstan oblysy búkil elmen birge Ulttyq dombyra kúnin atap ótýde. Merekelik is-sharalar oblystyń barlyq 12 aýdanynda jáne Oral qalasynda uiymdastyrylyp, myńdaǵan turǵynnyń basyn qosty. Baǵdarlama aiasynda kontsertter, shyǵarmashylyq aktsiialar, dombyrashylar baiqaýy, ulttyq sport túrlerinen jarystar, marafondar, kórmeler jáne aýqymdy fleshmobtar ótkizilýde, dep habarlaidy dalanews.kz.
Tańerteńnen bastap merekelik kóńil kúi qalalar men aýyldardyń ortalyq alańdarynda, mádeniet úilerinde, saiabaqtarda jáne qoǵamdyq keńistikterde sezilýde. Munda Qurmanǵazy, Dáýletkerei, Dina Nurpeiisova, Qazanǵap syndy uly kúishi-kompozitorlardyń máńgilik kúileri oryndalýda.
Biyl balalar men jastardyń qatysýyna erekshe kóńil bólindi. Máselen, Bórli aýdanynda mýzyka mektepteri men shyǵarmashylyq úiirmelerdiń 300-ge jýyq tárbielenýshisi qatysqan aýqymdy fleshmob uiymdastyryldy. Jas dombyrashylar qazaqtyń áigili kúilerin bir mezette oryndap, ulttyq ónerdiń sabaqtastyǵy men dástúrdiń urpaqtan-urpaqqa jalǵasyp kele jatqanyn kórsetti.
Merekelik sharalar kontserttik alańdarmen ǵana shektelgen joq. Oral qalasynda qoǵamdyq kólik te erekshe shyǵarmashylyq alańǵa ainaldy. Qalalyq avtobýstarda mýzyka mektepteriniń tárbielenýshileri jolaýshylarǵa arnap dombyrada qazaqtyń belgili kúilerin oryndap, jol ústinde erekshe merekelik atmosfera syilady. Kútpegen mýzykalyq tartý qala turǵyndarynyń ystyq yqylasyna bólenip, jolaýshylar jas ónerpazdarǵa qol soǵyp, olardyń ónerin beinejazbaǵa túsirip, tanys kúilerdi birge yńyldap otyrdy.
Uiymdastyrýshylardyń aitýynsha, Ulttyq dombyra kúniniń basty maqsaty – qazaq halqynyń bai mýzykalyq murasyn saqtaý, ulttyq ónerdi dáripteý jáne dástúrli kúi ónerine degen súiispenshilikti jas urpaqqa jetkizý. Sondyqtan dástúrli kontserttik baǵdarlamalar fleshmobtarmen, shyǵarmashylyq aktsiialarmen, interaktivti alańdarmen jáne ashyq aspan astyndaǵy óner kórsetýlermen tolyqtyryldy.
Merekeniń sharyqtaý shegi keshki ýaqytta Oral qalasynda ótetin «Dombyra – dáýir úni» atty mýzykalyq marafon bolmaq. Saltanatty sharaǵa oblys basshylyǵy qatysady. Merekelik keshte Dáýletkerei atyndaǵy qazaq halyq aspaptar orkestri, óńirdiń belgili ónerpazdary men shyǵarmashylyq ujymdary óner kórsetedi. Kesh sońynda qatysýshylar qazaqtyń áigili kúilerin birlese oryndap, ulttyq muraǵa degen qurmet pen urpaqtar sabaqtastyǵyn pash etedi.
Oral qalasynyń turǵyny Erlan Saǵyndyqovtyń aitýynsha, Ulttyq dombyra kúni búginde túrli býyn ókilderin biriktiretin erekshe merekege ainalǵan.
«Dombyra – jai ǵana mýzykalyq aspap emes. Ol – halqymyzdyń tarihy, mádenieti men ulttyq rýhynyń simvoly. Balalardyń dombyrany erekshe yqylaspen oryndap jatqanyn kórgende, ulttyq dástúrimizdiń jalǵasyp kele jatqanyn sezinesiń. Osyndai merekeler jastardyń óz tamyryna degen qurmetin arttyryp, mádeni muramyzdy baǵalaýǵa tárbieleidi», – deidi ol.
Jyl saiyn Ulttyq dombyra kúni elimizdegi eń aýqymdy mádeni merekelerdiń birine ainalyp keledi. Biyl da Batys Qazaqstan oblysynda uiymdastyrylǵan merekelik baǵdarlama ulttyq mýzyka men mádenietke degen qyzyǵýshylyqtyń artyp kele jatqanyn aiqyn kórsetip, óńir turǵyndaryn qazaq halqynyń rýhani murasyn aishyqtaityn qasietti dombyranyń tóńiregine toptastyrdy.
