Baiqońyr qalasyndaǵy aýrýhanada eńbek zańnamasynyń talaptary buzylǵany anyqtalyp, nátijesinde 444 meditsina qyzmetkeriniń eńbek quqyqtary qalpyna keltirildi, dep habarlaidy dalanews.kz.
QR Bas prokýratýrasynyń málimetinshe, Baiqońyr qalasynyń prokýratýrasy jergilikti aýrýhananyń ujymdyq shartyndaǵy zańnamaǵa qaishy talaptardy anyqtaǵan.
Atap aitqanda, mindetti meditsinalyq jáne zerthanalyq tekserýlerdiń shyǵynyn meditsina qyzmetkerleriniń ózderi tóleýi tiis bolǵan. Bul ziiandy jáne qaýipti eńbek jaǵdaiynda jumys isteitin qyzmetkerlerge qosymsha qarjylyq mindet júktegen.
Prokýrorlyq qadaǵalaý aktisinen keiin ujymdyq sharttaǵy atalǵan talaptar qoldanystaǵy zańnamaǵa sáikestendirildi. Endi mindetti meditsinalyq tekserýlerdiń shyǵynyn jumys berýshi óteidi.
Nátijesinde 444 meditsina qyzmetkeriniń eńbek quqyqtary qalpyna keltirilip, eńbek zańnamasynyń talaptaryn saqtaý qamtamasyz etildi.
