Áleýmettik jelide Nursultan Nazarbaevqa arnalǵan jazba kópshiliktiń nazaryn aýdardy. Instagram qoldanýshysy Lázzat Asanova Qazaqstannyń Tuńǵysh prezidentine saýlyq tilep, "Aýyrmańyz, Nursultan aǵa!" degen jazba jariialaǵan, dep habarlaidy dalanews.kz.
Avtor óz jazbasynda el basqarýdyń úlken jaýapkershilik ekenin aityp, táýelsizdiktiń alǵashqy jyldaryndaǵy kúrdeli kezeńderde memleket tizginin ustaǵan tulǵalardyń eńbegi tarihta qalatynyn atap ótken. Onyń sózinshe, Nursultan Nazarbaev eldiń qalyptasý kezeńinde ekonomika, syrtqy saiasat jáne elordany damytý baǵytynda aýqymdy jumystar atqardy.
"Halyqtyń alǵysy men aq batasy – elge qyzmet etken azamat úshin eń úlken marapat. Densaýlyq – adamǵa berilgen eń qymbat nyǵmetterdiń biri. Sondyqtan el aǵasyna saýlyq pen uzaq ǵumyr tileý – halqymyzdyń izgi dástúri", – dep jazǵan Instagram qoldanýshysy.
Sonymen qatar ol jazbasynda el ishinde birlik pen turaqtylyq saqtalyp, kók bairaq árdaiym biikte jelbirei berýin tilegen. Jeli qoldanýshysy jariialanymǵa jasandy intellekt arqyly jasalǵan Nazarbaevtyń aýrýhanada jatqandai sýretin de qosa salǵan. Alaida bul sýrettiń naqty oqiǵamen bailanysy bar-joǵy rastalmaǵan.
Aita keteiik, buǵan deiin Nursultan Nazarbaevtyń densaýlyǵyna qatysty aqparat jelide taraǵan edi. Astanadaǵy University Medical Center meditsinalyq ortalyǵy Nazarbaevqa júregine taǵy da operatsiia jasaldy degen aqparatqa túsinikteme berip, taraǵan málimetterdiń eski ári ózektiligin joǵaltqanyn málimdegen. Ortalyq qoǵamdy tekserilmegen aqparat taratpaýǵa shaqyrǵan.
UMC málimetinshe, Nazarbaevqa jasalǵan operatsiia týraly sońǵy resmi aqparat 2023 jyly jariialanǵan. Ol kezde hirýrgiialyq aralasýdy belgili kardiohirýrg Iýrii Pia júrgizgeni habarlanǵan bolatyn.
