Atyraýda memlekettik mektep muǵalimi ákimshilik tarapynan synyp bólmesin jóndep, qajetti tazalyq quraldaryn óz qarajatyna alýǵa májbúr bolǵanyn aitty. Ol basynan ótken jaǵdaidy Threads jelisinde jariialady, dep habarlaidy dalanews.kz.
Muǵalimniń aitýynsha, oǵan kabinetke jóndeý júrgizý tapsyrylǵan. Ol janjal shyǵarǵysy kelmegendikten, bólmeni óz kúshimen retke keltirgen. Sonymen qatar muny oqýshylary taza ári qolaily synypta bilim alýy úshin jasaǵanyn atap ótti.
"Bizdi kabinetke jóndeý jumystaryn júrgizýge májbúrledi. Men janjal shyǵarǵym kelmei, bárin oryndadym. Muny tek mindettegendikten emes, oqýshylarym úshin synypty retke keltirý mańyzdy bolǵandyqtan jasadym. Kabinettiń jaǵdaiy óte nashar edi, balalar men olardyń ata-analarynyń aldynda uialdym", - dep jazdy pedagog.
Onyń sózinshe, bir apta boiy synyptyń edenin jýyp, shańyn súrtip, qabyrǵalaryn áktegen. Bul atqarylǵan jumystyń az ǵana bóligi bolǵanyn aitqan muǵalim kún sońynda fizikalyq turǵyda qatty sharshaǵanyn jetkizdi.
Alaida demalysta júrgenine qaramastan, mektep ákimshiligi odan qosymsha jumystardy da talap ete bastaǵan. Pedagogke tóbedegi shamdardyń shańyn súrtý tapsyrylǵan.
"Ol úshin basqyshqa shyǵyp, elektr qurylǵylaryna jaqyndaý qajet. Men sypaiy túrde bas tarttym. Buǵan jaýap retinde: "Úiińizdegi aspashamdardy jýmaisyz ba? Basqysh degen qural bar. Ózim únemi qoldanamyn, sizge de usynamyn", - dedi", - dep jazdy muǵalim.
Pedagog úidegi sharýasynyń eńbek mindetterine qatysy joq ekenin aityp, muǵalim retinde ǵana jumys istegisi keletinin málimdedi. Sondai-aq ol mektep qajetine arnalǵan jýǵysh zattardy óz qarajatyna satyp alýǵa májbúr bolǵanyn alǵa tartty.
Qazaqstanda pedagogterdi kásibi mindetine qatysy joq jumystarǵa tartýǵa zańmen tyiym salynǵan. "Pedagog mártebesi týraly" zańǵa sáikes, muǵalimnen bilim berý qyzmetine qatysy joq mindetterdi oryndaýdy talap etýge jol berilmeidi.
Ázirge Atyraý oblysynyń bilim basqarmasy men atalǵan mektep ákimshiligi muǵalimniń málimdemesine qatysty resmi túsinikteme bergen joq.
