Atyraýda meiramhanalar jelisinde býhgalter bolyp jumys istegen áieldiń kásiporyn shottarynan 44 million teńgeden astam qarajatty zańsyz aýdarǵany anyqtaldy, dep habarlaidy dalanews.kz.
Sot qujattaryna sáikes, 41 jastaǵy áiel birneshe jyl boiy jergilikti kásipkerdiń meiramhana biznesine qarasty kompaniialarda esepshi qyzmetin atqarǵan. Onyń mindetine Azattyq dańǵylyndaǵy Barma meiramhanasynyń qarjylyq esebin júrgizý de kirgen.
Tergeý málimetinshe, 2024 jyldyń tamyzy men jeltoqsany aralyǵynda meiramhana shotynan shamamen 28 million teńge shyǵarylǵan. Qarajattyń bir bóligi tehnikalyq qyzmet kórsetý men jóndeý jumystaryna jumsaldy dep kórsetilgenimen, is júzinde mundai jumystar júrgizilmegen.
Sonymen qatar býhgalter óz esepshotyna «taýar satyp alýǵa arnalǵan esepti soma» degen negizben 8 million teńgeden astam aqsha aýdarǵan. Alaida bul qarajatqa eshqandai taýar alynbaǵany belgili boldy.
Tergeý barysynda áieldiń osy meiramhana tobyna qarasty taǵy bir kásiporynnyń shotynan 16 million teńgeden astam qarajat aýdarǵany anyqtalǵan. Nátijesinde zańsyz shyǵarylǵan qarjynyń jalpy kólemi 44 million teńgeden asqan.
Quqyq qorǵaý organdarynyń dereginshe, kúdikti aqshanyń bir bóligin qolma-qol sheship alyp, qalǵanyn jeke depozittik shotyna ornalastyrǵan.
Sot otyrysynda aiyptalýshy óz kinásin tolyq moiyndady. Ol bul áreketke otbasylyq qiyndyqtar men qarjylyq máselelerge bailanysty barǵanyn aityp, qarajatty keiin qaitarýdy kózdegenin jetkizgen.
Sot úkimimen áiel bes jylǵa bas bostandyǵynan aiyrylyp, sondai-aq bes jyl merzimge materialdyq jaýapkershilikke bailanysty qyzmetterdi atqarý quqyǵynan aiyryldy. Alaida kámeletke tolmaǵan balasynyń bolýyna bailanysty jazany óteý bes jylǵa keiinge shegerildi.
Qazirgi ýaqytta sot úkimi zańdy kúshine engen joq.
