Aqmola oblysyndaǵy saiajai alabynyń jaǵajaiynda qaiǵyly jaǵdai boldy. Elorda mańyndaǵy sý aidynynda demalyp júrgen 2015 jáne 2017 jyly týǵan ápkeli-sińlili eki qyz qaza tapty, dep habarlaidy dalanews.kz.
Oqiǵa Aqmola oblysy Tselinograd aýdany Qoiandy aýyly mańyndaǵy "Parasat" saiajai alabynyń ortalyq jaǵajaiynda bolǵan.
Aldyn ala málimet boiynsha, sý jaǵasynda demalyp otyrǵan ata-anasy bir sátte qyzdaryn kózden tasa qylyp alǵan. Balalardyń janynda joq ekenin baiqaǵan soń, ata-anasy ózderi izdei bastaǵan. Keiin izdeý jumystaryna qutqarýshylar qosylǵan.
Kóp uzamai eki qyz da sýdan es-tússiz kúide tabylǵan.
Qutqarýshylar men oqiǵa ornyna jetken dárigerler balalarǵa shuǵyl reanimatsiialyq kómek kórsetkenimen, olardyń ómirin saqtap qalý múmkin bolmady.
Qazirgi ýaqytta quzyrly organdar oqiǵanyń barlyq mán-jaiy men sebepterin anyqtap jatyr. Balalardyń sýǵa qalai túskeni jáne eresekterdiń qaýipti der kezinde nege baiqamaǵany tekserilýde.
